Ontmoet die kliënte
Eienaar en stigter van The Distilling Natives en Native Kulture
Ashley is van Ga-rankuwa noordwes van Pretoria en het voorheen twee restaurante besit, onder meer die Afro Lounge Kitchen Bar in Karenpark in die Jakarandastad.
“Omdat restaurante so ’n verskriklik genadelose en mededingende besigheid is, het ek in 2013 begin rondspeel met die idee om my eie wyn- en bierreeks te begin,” vertel hy.
Maar toe jenewerkoors behoorlik posvat in Suid-afrika, besluit hy om eerder sy hand aan dié drankie te waag.
“Ek was meer van ’n konjakman toe ek nog as vlugkelner by die SAL gewerk het, maar het altyd ook van gin gehou. Met Native Kulture het ek van die begin af geweet ek wil nie ’n professionele stoker word nie... my plan was om ’n sterk handelsmerk en goeie produkte te ontwikkel wat ek kon verkóóp.”
Hy het Incendo genader en binne ’n maand was daar finale monsters, ’n sterk handelsmerk-identiteit én eiesoortige verpakking
– die grafiese ontwerper wat destyds spyskaarte vir Ashley se restaurante ontwerp het, het daarmee gehelp. Tans bestaan die reeks uit drie jenewers – een waarin hibiskus die botoon voer, ’n heuningbosjenewer en ’n beperkte hoeveelheid sitrusjenewer wat met die skil van cara-cara-nawellemoene gegeur word.
“Dit is baie opwindend om ’n nuwe produk te skep, maar heluit moeilik om dit te verkoop. Ek onthou hoe opgewonde ek was die dag toe ek met die eerste besending bottels hier wegry, en ek moet erken die grootste verrassing – of is dit skok? – is hoe moeilik dit is om te verkoop. Maar sewe maande later is Native Kulture nou ook in Botswana te kry en dit is steeds ’n lekker en uitdagende reis.”
The Distilling Natives @thedistillingnative_ash info@thedistillingnatives.co.za 076 483 8227