Hier skep ons sélf geleenthede
Waar is die platteland? Vir elke leser van hierdie tydskrif is die antwoord op dié vraag ’n ander plek.
Vir my is die platteland daardie plek waar niks eintlik naby is nie. Jy is nie naby ’n stad of groot dorp nie. Jy is nie naby groot winkels of “Woolies Foods” en deli’s nie. Jy is ook nie naby restaurante waaroor resensies gedoen word nie en ook nie naby kitskosplekke nie. Jy is nie naby enige soort teater of vermaaklikheidsplekke nie. Jy is naby niks nie en daarom moet jy vir alles wat jy wil doen, deeglik beplan, begroot en bereid wees om te ry.
Nieuwoudtville is so ’n plek. Ons is nie te ver van Vredendal af nie (70 km) en Kaap toe is net 350 km. Ons het winkels wat in al die basiese behoeftes voorsien: ’n garage, koöperasie, slaghuis en kruidenierswinkel.
Ons ken elke moontlike afleweringsfirma en is meesters daarvan om geleenthede te soek en kry. Vir seker het ons die kuns van vra, pleit, manipuleer en organiseer bemeester om goed van daar ver af by ons afgelewer te kry. Familie, vriende en vriende van vriende help waar hulle kan – met groot waardering van die ontvangers.
Hier bak en kook ons en maak vir onsself kos. Ons kuier, braai en eet saam pleks daarvan om na ’n restaurant of kitskosplek toe te gaan. Ons probeer nuwe idees en tegnieke en smake, en glo heimlik ons kan beter kosmaak as vele sjefs.
Wat is die punt wat ek probeer maak? Op so ’n ver plek skep ons sélf geleenthede om ons horisonne te verbreed. Ons dorp se vroue en gemeenskap is bedrywig met talle projekte en geleenthede, en een daarvan is die Kos-en-wynfees wat vanjaar die derde keer gehou is.
Die geleentheid daag ons op vele vlakke uit en beproef al die kennis wat ons opdoen deur slaafs na kosprogramme te kyk en elke resepteboek te verslind. Ure en dae word
bestee om dekor, geregte en die regte wyne te beplan. Ons dink en oefen en sit dit dan uiteindelik feestelik voor.
Die tema vir 2020 is “In die woud”, en die dekoritems word verkry uit die omgewing, almal se kaste en selfs skrootwerwe – en op kreatiewe wyse omskep in ’n palet van roes, goud en brons.
Die soel, warm somersaand begin met ’n gin bar waar jou drankie in ’n bolronde glas bedien word met bessies en kruie en sagte eetbare blomme. En die spyskaart is omtrent ’n fees: • Aartappel-en-preisop,
bedien in ’n goue uitgeholde pampoentjie. Daarby kom chorizokrummels en ’n varsgebakte kaasbeskuitjie. Wyn: Stellar Organics Chardonnay.
• Vars oesters bedien met grenadella-en-mentsorbet, iets wat vir die gemiddelde plattelander ’n effens vreemde ervaring is. Wyn: Stettyn Family Vineyards Chenin Blanc.
• ’n Slaai van vars groen groente met biltong, groenvye en roomkaastruffel, afgerond met ’n heuningen-mosterdslaaisous. Wyn: Doringbay Sauvignon Blanc. • Eend-en-pannekoekstapel voorgesit met versuikerde lemoenskil en skyfies vars lemoen, lemoenjellie en fyn geelwortels. Wyn: The Emily Chardonnay Pinot Noir.
Nou moet ons eers ’n blaaskans neem sodat die kos kan afsak om plek te maak vir die volgende sessie, en daarom geniet ons ’n basilie-en-mentsorbet as mondverfrisser.
Tyd vir die tweede sessie: • Varkterrien met appelkosies en bosbessies, en bros varkrepies en bruschetta. Wyn: Maree Family Wines se Pieter and the Jackal
(’n versnit van shiraz en cabernet sauvignon).
• Fyngesnyde beeshaas voorgesit met ’n romesco-, chimichurri- en groenpeperkorrelsous. Die pêrel-couscous en roerbraaisampioene met geroosterde tamaties is perfekte pasmaats. Wyn: Definitum Petit Verdot 2017. • Die ete word afgesluit met ’n dekadente nagereg van parmesaankaaskoek, beskuitjie, vars pynappel,
’n suikerglasbal en olyfoliedruppels – ’n kunswerk wat lyk soos ’n kaasbord en smaak soos ’n feetjie wat op jou tong dans. Wyn: Genevieve MCC.
Laataand kuier almal rondom ’n tradisionele kaasbord en koffie, en ons weet sonder twyfel die platteland is goed vir jou siel en menswees.
Die platteland kan uiteindelik wees net waar dit wil, maar met die span se nabetragting en kuier – en ’n bottel of twee wyn later – kom ons tot die slotsom dat hiér presies is waar ons wil wees.
Op die platteland waar niks naby is nie, werk ons saam, baklei en stry ons saam, lag en huil ons saam, kuier ons saam en verdra mekaar se swakhede… uiteindelik gee ons regtig om vir mekaar en vir ons dorp.