Die SA Plastics Pact
Die SA Plastics Pact is samewerkingsinisiatief wat al die belanghebbendes in die plaaslike plastiekwaardeketting byeenbring om plastiekafval en -besoedeling by die bron aan te spreek. Die ooreenkoms wil ook ’n veerkragtiger sirkulêre ekonomie vir plastiekverpakking skep wat die welstand van mense én die omgewing in gedagte hou en by bestaande plaaslike inisitatiewe inskakel.
Die ooreenkoms – die eerste in Afrika wat deel vorm van die Ellen Macarthur-stigting se Global Plastics Pact-netwerk – het reeds meer as 20 lede, wat insluit Pick n Pay, Woolworths, Spar, Shoprite en Checkers, Food Lover’s Market, Massmart, Clicks, Spur Holdings, Unilever, Tiger Brands, Addis, Tuffy, Danone, Distell, TFG (die Foschini-groep), Coca-cola Africa en Homechoice. Hulle onderskryf vier ambisieuse, tydsgebonde doelwitte wat sal verseker dat dié ooreenkoms teen 2025 dramatiese veranderinge in die bedryf teweegbring.
1
Identifiseer problematiese of onnodige plastiekverpakking deur middel van herontwerp, innovasie of hergebruik, en stem in tot nuwe maatreëls teen die einde van 2021.
2
100% van alle plastiekverpakking moet teen 2025 herbruikbaar of herwinbaar of komposteerbaar wees.
3
70% van alle plastiekverpakking moet teen 2025 herwin word.
4
Alle plastiekverpakking (oor alle produklyne) moet teen 2025 minstens 30% herwonne materiaal bevat.
Pak kos in vir skool of werk en vermy verpakte wegneemkos.
Ondersteun “nude”-besighede en vra ander winkels om ook hervullingstelsels te ondersoek waar die gebruiker hulle eie houer kan saamvat vir byvoorbeeld olyfolie of reinigers.
Volg die nuwe aanwysings vir herwinning deur byvoorbeeld bottels eers uit te spoel voor jy dit herwin.
Besoek ons Facebookblad en kyk ’n kort video oor hoe herwonne plastiek in “nuwe” plastiek verander word.
Platteland
Druk plastiekbottels plat sodat dit minder plek opneem in dromme en lorries (en makliker herwin kan word) en draai die doppies op, anders raak dit verlore (en rommel)! Onthou, ’n kombinasie van materiale veroorsaak soms dat verpakking nie herwin kan word nie, soos alle saamgestelde materiale (#7 in die driehoekie), maar ook iets eenvoudigs soos ’n plakker op ’n broodsak of ’n plastiekbottel met ’n stukkie foelie wat in die bek agterbly.