Romerige klapperbircher-muesli met bloubessie-compote
Bircher-muesli is beroemd gemaak deur die Switserse huisarts dr. Maximilian Bircher-benner – hy het sy pasiënte aangeraai om dit te eet sodat hulle vinniger kan herstel van siektes. Tot vandag toe word dit as goeie, gesonde kos beskou. As jy van hawermout hou, gaan jy gaande wees hieroor!
Genoeg vir 4
Bereidingstyd 10 minute plus yskastyd oornag Gaarmaaktyd 6-8 minute plus afkoeltyd
JY BENODIG
VIR DIE BIRCHERMUESLI
• 120 g hawermout
• 20 g droë klapper
• 3 eetlepels (45 ml) amandelmeel • 1 teelepel (5 ml) fyn kaneel
• ’n knippie sout
• 2 eetlepels (30 ml) heuning
• 1 koppie (250 ml) amandelmelk • 300 ml dubbeldik jogurt
• 1 ‘Pink Lady’-appel, ongeskil
en grofgerasper
VIR DIE BLOUBESSIECOMPOTE • 150 g bloubessies
• 1 eetlepel (15 ml) suurlemoensap • 2 eetlepels (30 ml) water
• 2 eetlepels (30 ml) heuning
BOLAAG
• vars of bevrore bessies, geroosterde klapperskaafsels en ’n hand vol pistasieneute of amandels
SÓ MAAK JY
Meng die bestanddele vir die birchermuesli in ’n groot mengbak saam. Bedek en sit dit oornag in die yskas.
Plaas al die bestanddele vir die compote in ’n kastrol en verhit dit tot kookpunt. Laat die mengsel vir 6-8 minute prut tot stroperig. Laat dit eenkant afkoel.
Skep die muesli in bakkies en dan van die bloubessie-compote bo-oor, gevolg deur vars (of bevrore) bessies, klapperskaafsels en neute.