Appel-en-rogmuffins

’n Goeie muffin is amper soos jou gunsteling-jeans: betroubaar, nie te uitspattig nie dog noodsaaklik. Dié weergawe is veganisties, maar moenie dat dít jou oordeel beinvloed nie. Jy weet dadelik waaroor dit gaan: ’n ode aan appels.

Maak 9 groot muffins Bereidingstyd omtrent 30 minute plus rus- en afkoeltyd

Baktyd tot 35 minute

JY BENODIG

• 1 eetlepel (15 ml) vlassaadmeel

• 3 eetlepels (45 ml) water

• koppie (80 ml) appelmoes

• koppie (80 ml) gesmelte klapperolie • koppie (80 ml) amandelmelk

• 1 teelepel (5 ml) vanielje-ekstrak

• 90 g demerara- of klappersuiker

• 90 g koekmeel

• 80 g steengemaalde rogmeel

• 1½ teelepel (7,5 ml) fyn kaneel

• ½ teelepel (2,5 ml) gemengde speserye • ¼ teelepel (1,25 ml) fyn sout

• 1½ teelepel (7,5 ml) bakpoeier

• 2 appels, skil en klokhuis verwyder en in

dun skyfies gesny

• koppie (80 ml) amandelvlokkies • versiersuiker om oor te sif

VIR DIE ESDORINGAPPELBLOKKIES • 2 appels, geskil en in blokkies van 1 cm gesny

• ¼ koppie (60 ml) water

• 2 teelepels (10 ml) suurlemoensap • 2 eetlepels (30 ml) esdoringstroop

SÓ MAAK JY

Begin met die esdoring-appelblokkies. Verhit die appel en water in ’n pan en laat dit vir 5-6 minute oor matige hitte prut. Voeg die suurlemoensap en esdoringstroop by en kook dit vir nog 2-3 minute. Die water moet wegkook en die appels karamelliseer. Laat dit eenkant afkoel.

Verhit die oond tot 180 ºc. Voer 9 holtes van ’n gewone muffinpan met kolwyntjiepapiertjies uit.

Meng die vlassaadmeel en water in ’n mengbak en laat dit vir 5 minute eenkant staan. Voeg dan die appelmoes, klapperolie, amandelmelk, vanielje en suiker by die vlassaad-jel. Klits dit met ’n ballonklitser tot goed deurgemeng.

Sif die koek- en rogmeel saam, met daarby die speserye, sout en bakpoeier. Voeg die nat bestanddele hierby en vou alles deur tot net-net gemeng. Voeg nou die afgekoelde esdoringappel by en meng dit liggies deur.

Verdeel die mengsel eweredig tussen die 9 muffinpapiertjies. Druk die appelskyfies in die beslag en sprinkel die amandelvlokkies oor. Bak dit vir 30-35 minute. Laat dit afkoel en sif versiersuiker oor.