Lanolien 101

Lanolien word deur die oliekliere in skape se vel afgeskei en is dus ’n natuurlike, organiese, omgewingsvriendelike en volledig bioafbreekbare stof van ’n hernubare bron. Die oes daarvan benadeel nie die diere op enige manier nie.

• Hoe word dit geoes? Die skaapwol word in warm water gewas om ontslae te raak van vuiligheid, sand, wolvet (ongesuiwerde lanolien), sweetsoute en enigiets anders wat aan die wol klou. Die rou, donker, ongesuiwerde lanolien word sentrifugaal of deur oplosmiddelekstraksie verkry. In dié rou vorm het dit

’n sterk skaapreuk, maar verskeie tegniese gebruike, soos in smeermiddels, teenroesbehandelings, chirurgiese en industriële kleefband, metaalsnyolies, drukkersink en leerversorgingsprodukte. In die Middeleeue het ridders glo hulle wapenrusting en gereedskap met ’n dun lagie ongesuiwerde lanolien ingesmeer en só gesorg dat dit behoue bly. (Vir aanwysings oor hoe om self lanolien te onttrek google “How to extract lanolin from sheep’s wool”.)

• Waar word dit geoes? Sover die Stegmanns en Platteland kon vasstel, word lanolien nie op kommersiële skaal in Suid-afrika geoes of tot mediesegraad lanolien gesuiwer nie. Die meeste wol verlaat Suidafrika ongewas en die lanolien word oorsee onttrek en verwerk. Om in kosmetiese produkte gebruik te word, gaan dit deur tot vyf verdere suiweringsprosesse om die suiwerste mediesegraad lanolien te verkry. Die meeste mediesegraad lanolien kom uit China, Brittanje, België, Japan, Tsjeggië, Duitsland, Viëtnam en Indië.

• Wat is die voordele? Lanolien vang vog vas in die vel, verbeter soepelheid en skep ’n beskermende laag wat die liggaam help om homself te genees. Dit word gebruik in gesig-, hande- en babarome, lipbalms, hipo-allergeniese grimering en ryk vogrome vir droë vel, gebarste tepels en hakke, ekseem en skrape.