Ontmoet die mense
Ludwig en Retha Everson Eienaars van die Aardskip
Ludwig en Retha Everson het in 2009 teen ’n weggesteekte natuurlike heuweltjie in Robynstraat hulle Aardskiphuis begin bou – ’n praktiese uitlewing van hulle strewe om so omgewingsvriendelik, selfvolhoubaar en onafhanklik as moontlik in harmonie met die natuur te leef. Hulle noem dit die groenste huis in Suid-afrika.
Die Aardskip is met slegs natuurlike en herwonne materiale gebou – van motorbande, bottels en blikkies tot sandsakke, strooibale en strooikleistene – en slegs volhoubare energie, soos ’n fotovoltaïese kragstelsel, songeiser en sonstoof, word gebruik. Die Eversons pas natuurlike klimaatbeheer toe deur die beginsels van termiese massa, termiese wins, ventilasie en isolasie.
“Omdat die huis in die heuwel ingebou is, is die binnetemperatuur meer konstant,” verduidelik Ludwig. “Die dik buitemure absorbeer die hitte van die son en help om die huis koel te hou in die somer en warm in die winter. Die groot vensters wat noord front en die afdak help om die son in te nooi of weg te hou wanneer nodig. Ons hou die kleiner bovensters meestal oop, maar maak dit toe voor dit buite warmer raak as binne. Dit werk goed. In gister se snikhete 42 ºc was die temperatuur 32 ºc in die gang by die groentetuin en 28 ºc in die kamer.”
By die Aardskip word alle reënwater opgevang en in agt tenks van 40 kiloliter elk gestoor – en dan vier keer gebruik. “Vir elke 3½ mm reën eindig ons met ’n kiloliter water. Die water word ’n eerste keer gefiltreer vir huishoudelike gebruik, maar gaan vir drinkdoeleindes deur ’n tweede filter met ultravioletlig. Die huishoudelike gryswater loop uit in die binnenste groentetuin, waar die plante dit dan gebruik. Die res syfer deur na ’n ondergrondse put waar dit geberg word om die toilette te spoel. Die swart
water beland weer in ’n septiese tenk waar dit mettertyd vir die buiteplante gebruik word.”
Ludwig, ’n sagteware-ingenieur wat uit Orania werk vir ’n maatskappy in Kempton Park wat konstruksiesagteware aan die boubedryf verskaf, vertel hulle het van die Aardskip-konsep gehoor toe hulle en hulle twee kinders nege jaar lank in Nederland gewoon het. Hulle het ook die aardskip in Zwolle besoek en onmiddellik gedink dit is ’n konsep wat baie goed in Suid-afrika sal werk.
“Die jare in Nederland was wonderlik, maar ons het tog mettertyd begin voel dis nie ons mense nie,” sê Retha, wat die Betésda Gesondheidshuis bestuur. Sy lag. “Die Nederlanders is ontsettend reguit en sê en doen wat hulle wil, terwyl ons mense is wat tussen die lyne lees.”
“Ons is baie minder soos die Nederlanders en Duitsers, en meer flambojant soos die Franse... en ook glad nie so hardwerkend as wat ons dink nie!” voeg Ludwig by.
Die Eversons het in Nederland een van die Orania-beweging se inligtingsessies bygewoon en besluit om self te kom kyk. “Orania is destyds as baie ‘groen’ verkoop en huishoudings moes destyds al hulle afval in 5 kategorieë – nie-herwinbaar, papier, plastiek, glas en metaal – sorteer. Die Aardskip-idee het dus goed daarby ingepas.
“Deesdae is sonkraggeisers verpligtend in alle nuwe huise wat op Orania gebou word, maar dit voel tog of die ‘omgewingsvriendelike’ hoek nie meer so sterk gedryf word soos in die begin nie.”
Wat hulle met hulle eerste besoek aan Orania opgeval het, is die geselligheid en gasvryheid van die mense, en die kinders wat soos in Nederland op straat speel sonder om bang te wees – “soos dit hoort”, sê Retha.
Maar die dorp het die afgelope 15 jaar dramaties verander, en dit voel deesdae soms of hier te veel mense is, sê hulle. As dinge begin druk, pak hulle die kar en ry die 650 km tot op Jeffreysbaai, waar albei hulle volwasse kinders bly. Maar hulle keer altyd terug na die Aardskip, die kokon sonder koolstofvoetspoor wat hulle self gebou het.
Maak vooraf ’n afspraak en gaan kyk gerus self.
Kontak aardskip.com Aardskip
info@aardskip.com 073 134 9671 >