PADTOESTAND EN ROETES
Al die paaie in Mokala is grond, maar heeltemal rybaar in enige 4x2 met ’n bietjie grondvryhoogte. Die hoofroete tussen die Mosu- en Lilydale-ruskamp is gewoonlik in ’n goeie toestand en die meeste wild is hierlangs te sien. Die Doornlaagte-, Kameeldoring- en Knietjie-sirkelroete is almal mooi opsies langs die hoofroete.
Hier is ook twee kort 4x4-roetes (3,5 km elk) nader aan Lilydale. Dit is egter heel maklike tweespoorpaaie wat ook in ’n 4x2 gedoen kan word. As jy by Lilydale oornag, is die Vaalbossirkelroete ’n mooi uitstappie teen laatmiddag. Hopelik is die uitkykpunt met sy houtdek binnekort weer reg, want dit is waar jy teen sonsondergang wil wees.
Indien jy by Mosu- of Motswedi-kamp oornag, is die Tsessebe-pad ’n goeie keuse om laatmiddag te ry. Die Matopi-sirkelroete loop deur pragtige veld met baie kameeldorings en witgatbome en jy gaan waarskynlik ’n troppie kameelperde te siene kry.
Mokala het twee piekniekplekke: Matopi (my gunsteling) en Kameeldoring. Albei het piekniektafels, braaiplek en ’n toilet.