MARTIE EN ERNST FISCHER Pretoria

Martie: By Kosibaai se riviermonding hou Suid-Afrika op, maar ’n nuwe wêreld gaan daar vir jou oop. Ons kon die bloue mere met hulle visfuike geniet deur te kajakroei en te snorkel, maar die wonderlikste ervarings was om te sien hoe die klein seeskilpadjies uit die sand “borrel” by Bhanganek. Ernst: Jy kon dit aanvoel in die stilte in die voertuie toe ons terugry nadat ons die seeskilpadjies gesien het. Dit is iets wat by jou bly, die wonder van daardie klein diertjies se epiese stryd om by die veiligheid van die see uit te kom. Die een oomblik is dit daar tussen die skuim, en die volgende oomblik is dit weg. Sal sy dalk eendag weer hier uitkruip om haar eie eiers te kom lê? Wie weet...