Bontebok- nasionale park
Bontebokke het nie ’n saak met besoekers aan dié gedugte klein park naby
Swellendam nie. Hulle wei op die gras tussen die chalets of staan in die skaduwee van ’n koelteboom in die kampterrein. Tussen Augustus en September is hier ook volop lammetjies in die reservaat.
Die Breërivier is die ander trekpleister; bring soveel waterspeelgoed as moontlik. Onthou, dis ’n propperse rivier en kinders moet onder toesig swem.
As die kinders moeg gedryf is op die opblaasflamink, kan julle ’n kajak stroomop by die uitkykdek of Die Stroom-piekniekplek te water laat en terugroei ruskamp toe.
Hier’s vier kort staproetes (van 1,6 km tot 5,4 km). Die Aloe Hill-roete (3,3 km) begin in die verste hoekie van die onderste kampterrein en is byna heelpad gelyk. Kinders wat gereeld stap, sal dit maklik kafdraf. Andersins, pak ’n paar jellielekkers as afpersmiddel in. Onthou water. Die paadjie kronkel al langs die rivier af verby groot aalwyne tot by ’n uitkykpunt, deur ’n stuk digte oewerbos en swenk dan “binneland” toe. Terwyl julle oor die oper vlaktes stap, kan jy die kinders vermaak met pretfeite oor die park (sien kassie). Namate julle weer nader aan die ruskamp kom, stap ’n mens verby ’n omheinde kol – dis waar kaptein Lang Elsie en haar volgelinge gebly het.
Waar bly ek? Lang Elsie’s Kraal-ruskamp is versprei oor twee vlakke. Die selfsorgchalets en ruim kampterrein is op ’n hoogtetjie. Die huisies het ’n uitsig oor die rivier en die Langeberg.
Na my mening is die beste blyplek die paar staanplekke onder op die oewer van die rivier. Jy kamp op ’n welige grasperk en die rivier maak ’n wye draai – dit lyk skoon soos die Amasonerivier! Dié staanplekke het egter nie krag of skaduwee nie en is ’n ent van die gemeenskaplike badkamers af. (Hier was baie duwweltjies tydens ons besoek – pak plakkies in!)
Koste Kamp: vanaf R285 p.n. sonder krag vir twee mense, R100 per ekstra persoon en R50 per kind, slaapplek vir ses. Chalet: vanaf R1 675 p.n. vir twee mense, R290 per ekstra persoon en R145 per kind, slaapplek vir vier of ses mense.