Die groter Richtersveld
As jy van die afgesonderdheid van die Richtersveld se parkgedeelte gehou het, het ek ’n wonderlike verrassing vir jou. Daar is selfs wilder en meer versteekte hoekies – maar daarvoor moet jy buite die parkgrense gaan soek.
Dinge gaan nou rof raak. Die spore is plek-plek dof. Die klowe gaan jou vir lang tye insluk en jy gaan dalk wonder of jy weer gaan uitkom. Moenie bang wees nie – dis hemels!
Die bekendste roete is die Namakwa4x4-ekoroete wat in die ooste van die streek naby Pofadder begin (Pofadder is eintlik Boesmanland, maar jy ry net so ent weg, dan’s jy in landskap wat tipies Richtersveld-bergwoestyn is), rofweg die Oranjerivier volg en dan verder wes teen die erfenisgebied verbykom. Dele van dié 600 km veldryroete loop deur diep sand en oor lelike klippe en jy gaan beslis ’n 4x4 nodig hê.
Kampplekke langs die roete is bloot oop kolle in die veld of langs die rivier.
Hier is geen water of ablusies nie; jy moet heeltemal vir jouself kan sorg en genoeg water, hout en kos saamry.
Suid van die park, rofweg tussen
Kuboes, Eksteenfontein en die Oranjerivier is die Richtersveld-wêrelderfenisgebied. Die ongelooflike verskeidenheid van unieke plante maak hierdie deel van ons land ekstra spesiaal. Hier kom sowat 2 700 spesies voor waarvan amper 600 nêrens anders te vinde is nie.
Kampplekke in die erfenisgebied is ook sonder geriewe: Bring álles saam.
Die mense is net so uniek en eie aan die streek soos die woestynblomme. Baie van hulle boer met skape en bokke. Aangesien die deel oor die grense van somer- en winterreën strek, trek die vee-oppassers gereeld agter beter weiding aan en is hier amper geen heinings nie. Dit beteken ’n groot stuk aarde lê fantasties woes en oop. Maar die berge keer jou gou voor en hulle vat nie nonsens nie. Jy gaan baie paadjies sien wat teen hoogtes uitkronkel of in geheimsinnige vlaktes wegraak.
Min van hulle is op kaarte gemerk, maar met Tracks4Africa op jou GPS gaan jy
regkom in die wêrelderfenisgebied, en die inligtingskantore op Eksteenfontein (Ons kon dié kantoor nie per telefoon bereik nie.
Dit het dalk gesluit, maar gaan kyk in elk geval. – Red.) en Kuboes sal ook help as jy daar aandoen.
Hier is darem ’n paar paaie wat jy met jou 4x2-bakkie kan ry (jy het goeie grondvryhoogte nodig). Die grondpaaie wat Lekkersing, Eksteenfontein, Sanddrift en Kuboes met mekaar verbind, is almal goeie grondpaaie (sinkplaat hier, los klip daar) wat jou die geleentheid gee om by al hierdie interessante dorpies aan te gaan.
Oorweeg ’n sirkelroete van Port Nolloth of Springbok wat jou in twee, drie dae verby Lekkersing, Eksteenfontein, Kuboes en Sanddrift neem en dan langs Alexanderbaai weer terugneem na jou beginpunt. Vat jou bergfiets saam, want dit is wonderlik om party van hierdie roetes te trap.
’n Veldpaadjie, waarvan die eerste helfte heel maklik is om te ry, mik noord uit Eksteenfontein in die rigting van die Rosyntjieberg. Hier is kampplekke in die veld wat jou wonderlike Richtersveldervarings bied. Onthou, hier is geen geriewe nie en jy moet vooraf by die Eksteenfontein-inligtingskantoor betaal. Daar sal jy ook ’n kaart en meer inligting oor die omgewing kry.
Tussen Eksteenfontein en Kuboes is die Tierhoek-kampplek teen massiewe rotse en met ’n wye uitsig oor die vlaktes. Jy moet weer eens alles wat jy mag nodig kry saamneem, maar jy is gewaarborg van ’n spesiale sonsondergang en aand onder die sterre.
Net buite Kuboes kan jy by Glybank kamp. Dis ’n lekker weggesteekte kolletjie teen die Ploegberg. Hier is net ’n puttoilet en jy betaal by die Kuboes-inligtingskantoor. Gaan kyk ook na die mooi spierwit kerk op Kuboes.
Op pad na Alexanderbaai is daar ’n laaste kampplek. By Brandkaros het jy elektrisiteit en ablusies én die Oranjerivier. Hier is ook selfsorgchalets as die gekamp vir eers genoeg was. Van Alexanderbaai is jy terug op teerpaaie, maar die Richtersveld se stof sal in jou binnekant bly en jou laat wonder waarheen al die ander paadjies loop wat jy gesien het.