NAMAKWA-4X4-EKOROETE
Hierdie vyfdagroete begin
15 km wes van Pofadder en eindig by Brandkaros, oos van Alexanderbaai. Hier is geen geriewe nie, en jy moet ten volle selfonderhoudend wees. Bring al jou water saam, en noodtoerusting indien iemand in jou konvooi se voertuig breek. Volgens Wilma James (van die roete se kantoor in Alexanderbaai) is daar onlangs beter aanwysings langs die roete aangebring en bordjies wat aandui waar die kampplekke is.
Daar sal binnekort nuwe kampplekke en roetes bygevoeg word – hou die webtuiste dop vir inligting. ’n Digitale kaart (of ’n papierkaart as jy verkies) van die roete word aan jou gestuur nadat jy die permit betaal het.
Tracks4Africa dui die roete goed aan en jy hoef deesdae nie meer ’n GPS-toestel te hê nie. Laai hulle selfoon-app (“Tracks4Africa Guide”, gratis) van die app-winkel, en koop dan die kaart van SuidAfrika (R99). Die Namakwa-4x4ekoroete word hierop aangedui. Dit begelei jou nie soos ’n GPS nie, maar jy kan die roete soos in ’n kaartboek volg.
Ek twyfel of daar ’n beter veldry-belewenis kan wees as wanneer jy vyf dae op dié roete deurbring. Die roete word in twee verdeel en jy kan kies of jy net ’n deel of die hele roete wil doen. Die “halfpadpunt” is Vioolsdrif, wat op die N7 is – daarom kan jy maklik van daar af byvoorbeeld huis toe ry.
Koste Van Pofadder (die meeste mense verkies egter om die toer sommer op Pella te begin) tot Vioolsdrif: R450 per voertuig en R200 p.n. per voertuig vir kampplek. Van Vioolsdrif tot
Brandkaros: R450 per voertuig en R200 p.n. per voertuig vir kampplek. Die hele roete: R900 per voertuig, plus R200 p.n. per voertuig vir kampplek.