Mandy Mitchell
Die Nhlamvini-vallei lê oos van Ixopo in die KWAZULU-NATALSE bosveld. Dis rofweg in die driehoek tussen die R56, R612 en die Umkomaasrivier. Dit is ’n bewarea wat oor verskeie wildplase strek en sodoende die ryk biodiversiteit van die omgewing help bewaar.
Ons boer hier en omdat ek ’n ywerige fotograaf is, verken ek gereeld die grondpaaie van die vallei. Dis openbare paaie, en enigiemand kan dit kom ry. Probeer die D299, D738 en die Inhlamvini-pad. Jy sal wild (agter die draad) sien soos jy ry.
Dis ’n wonderlike plek om vir ’n naweek se natuurtyd heen te ontsnap. Hier is ’n paar selfsorglodges in die omgewing – ek kan Oribi Bush Camp aanbeveel by die Nhlamvini-privaatwildreservaat. Jy kan diere sien soos seekoei, koedoe, oribi en kameelperd. Hulle bied wildritte aan, maar jy kan ook vooraf bespreek indien jy met jou eie kar wil rondry.
As jy in die winter kom, sal jy die streek se manjifieke aalwyne sien blom!