Brandon en Marcelle Danks
Ons hou daarvan om die Weenen-wildreservaat te besoek. Dis in die KZN-Middelland en sowat 5 000 ha groot. Dagbesoekers betaal R50 per volwassene en R25 per kind. Die kampterrein het geriewe vir woonwaens, boswaens en gewone tente. Die 4x4-roete in die reservaat is niks ernstig nie – ’n hoogtepunt is die smal staalbruggie waaroor jy met jou bakkie kan ry.
Dit is dalk klein, maar na ons mening bied die Cumberland-natuurreservaat ’n wilderniservaring wat kers vashou by enige van KZN se groter reservate. Dit is net oos van Pietermaritzburg en bied die beste uitsigte oor die uMngenirivier. Hulle laat nie dagbesoekers toe nie en jy moet dus oorslaap, maar die kampplekke is besonders – ons gunsteling is die uZavolo-kampplek (geen krag, donkie vir warm water). Dis ’n stapreservaat en jy mag nie met jou voertuig rondry (behalwe na jou blyplek) nie; dus is dit vreedsaam en goed vir die siel.
Ons is 4x4-mense en hou van kampplekke wat jou laat voel asof jy in die bos is, en dis hierdie kombinasie wat ons aanvanklik na die Eston 4x4 Valley Adventures gelok het. Dis ’n nuwerige plek in die Eston-Gwahumbe-omgewing sowat ’n uur se ry suidwes van Durban. Hier is wild, maar hulle is sku en moeilik om te sien – met geluk gewaar jy koedoe, bosbok, seekoei en vlakvark. Die 4x4-roetes word goed onderhou en jy kan dit in jou standaard-4x4 kom ry, of in jou opgezoepte een.
Nog ’n plek met goeie 4x4-roetes is die Tala-privaatwildreservaat naby Camperdown, sowat 45 minute van Durban. Hier is baie wild en voëls om te sien. Ons hou daarvan om die hitte van die dag uit te kolf by die piekniekplek langs Hippo Pools.