Xolani Tembu en Rea Ntshabele
Ons hou van stap, en die Queen Rose-staproete in die Nelshoogte-natuurreservaat (naby Barberton, Mpumalanga) het van die beste geriewe wat ons nog ooit vir voetslaners teëgekom het. Hoewel dit ’n provinsiale reservaat is, word die roete en Queen’s River Adventure Camp privaat bedryf. Die meeste van die tyd is dit skoolkinders wat hierheen kom vir karakterbou-naweke, maar stappers gebruik dit ook. Hier is dagstappe én ’n meerdagstap.
Ons het die swemgate in die rivier geniet en lang ure verwyl by die verskeie watervalle langs die Queen Rose-staproete. Die roete is goed gemerk, en nêrens sien jy rommel rondlê nie. Jy sien gewoonlik net kleiner boksoorte in die reservaat, maar op dag een van die roete het Rea wraggies ’n luiperd gesien!
Die Midmar-natuurreservaat is naby Howick in KZN. Ons het vir vier dae hier gekamp en dit was duidelik dat die personeel moeite doen om jou verblyf ’n plesier te maak. Ons het eers ná donker aangekom, maar het geen gesukkel by die hek gehad nie. Die badkamers is elke dag skoongemaak en ons het altyd warm water gehad. Omdat jy op die dam uitkyk, voel jy die rustigheid daarvan aan. Soggens se sonsopkoms oor die water was stroop vir die siel.
Die Oribi-ravyn is sowat 35 km van Port Shepstone, maar jy sien dit eers werklik die eerste keer wanneer jy by die Mac Valley-padstal aftrek. Ons was vinnig hier aan vir tuisgebak en warm drankies. Ons was net in Oribi Gorge-natuurreservaat vir die dag, en het dus nie oorgebly by die pragtige kampplek langs die rivier nie. Volgende keer!
Ons het ’n adrenaliendag beplan, en het Wild 5 Adventures se Wild Swing beproef, wat basies beteken dat jy van langs die bopunt van die Lehr-waterval afspring en oor die ravyn uitswaai! Pure plesier!