Lauren Currie
Ek is passievol oor waar ek woon. Rondom Gqeberha het ons soveel puik plekke waar jy die natuur kan geniet. In die hartjie van die stad is die Baakens Valley -en Settlers Park-natuurreservaat (gratis toegang) ’n lushof met lappies woud, watervalletjies en die rivier. Jy kan stap, draf of fietsry. Net buite die stad, na Seaview se kant toe, is die Island-natuurreservaat wat veral gewild is onder voëlkykers. Toegang kos rofweg tussen R55 en R85 per persoon per dag, afhangend of jy die piekniekplek wil gebruik, of net wil kom stap.
Ons gesin geniet dit om 3 Rivers Trails se geriewe te gebruik. Dis by Crossways Farm Village, 30 km wes van Gqeberha. Hier is netjiese voetpaaie en fietsryroetes wat tussen die proteas deur kronkel. Dagpermit: R50 per volwassene, R25 per kind jonger as 12. As jy ’n lekker ent gestap het, kan jy afkoel in die Vanstadensdam voordat jy terugstap oor die ou treinbrug terug na Crossways. Die Van Stadens-veldblomreservaat (gratis) is reg langsaan.
Die Groendal-natuurreservaat is naby Uitenhage en jy kan hier bergop stap tot by ’n groot swempoel en waterval. Toegang: R66 per volwassene, R34 vir kinders jonger as 12.
Vir ’n langer wegbreek– en régte boendoes – hou ons daarvan om die Baviaanskloof-wildernis in te vaar. Ons bly gewoonlik by Uitspan, wat aan die “ander kant” van die kloof is; dus vat dit ’n dag se 4x4-ry om daar uit te kom. Daar is ’n selfsorgblyplek en ’n lekker kampplek met baie gras en skaduwee. Jy kan in die dam swem waar avontuurlustiges die foefieslaaid kan aanvat. Stap gerus die Arch Rock-roete – dis ’n steil paadjie wat by ’n besonderse boogrots eindig. As jy dapper genoeg is, gaan staan bó-op vir ’n foto!