Obakeng Mohane
Dis vir my belangrik om elke naweek in die natuur te kom omdat dit my help herlaai vir die werkweek wat kom. Pretoria se Groenkloofnatuurreservaat is baie naby aan my huis, en ek kom gereeld daar. Het jy geweet dis die oudste reservaat in die land? Toe dit in 1895 deur Paul Kruger geproklameer is, was dit deel van die Fonteinedal-wildreservaat. Jy kan in die reservaat rondstap en wild soos sebra, kameelperd en volstruis sien. Dit kos R49 per volwassene per dag, R31 per kind jonger as 18 en R16 vir jonger as 7.
Of jy bloot net wil bene rek of besig is om voor te berei vir ’n langer staproete – Heidelberg se Suikerbosrand-natuurreservaat (sowat uur se ry uit Johannesburg) is puik vir albei. Die Bokmakierie-roete is 10 km lank – kom stap dit ’n paar keer voordat jy iets langer soos die Otter aandurf. Toegang is R45 per volwassene, R35 per kind onder 12, plus R35 per kar per dag.
Die Magaliesberg lê aan die teenoorgestelde kant van Johannesburg. Ek ry sommige Sondae uit na die Plumari-privaatreservaat om ’n draai te stap en iets by die Askari Lodge te eet. Ek onthou hoe ek eendag daar sit en laatontbyt eet het toe twee olifantbulle na die dam afstap om te drink. Hulle het soos twee ou vriende gelyk. Sulke soort Sondae is my idee van naweekhou!
Wanneer ek vinnig wil wegglip om diere te kyk, ry ek ’n draai deur die Rietvleinatuurreservaat, wat menige Gautenger se natuurtoevlug is.
In die omgewing van Muldersdrift-Wieg van die Mensdom is die Cradle Moon Lakeside Game Lodge ’n plek waarheen ek soms uitry om te gaan stap. Daar is ’n 9 km-roete wat om die dam loop en eindig by ’n “waterval”, wat eintlik net die dam se oorloop is. Ek het al rooibok, sebra en kameelperd hier gesien. Hulle het ’n lekker restaurant waar jy buite op ’n “strand” kan sit en uitkyk oor die dam.