Nasreen Roberts
Die roetes binne die Banhoek-bewarea (by Kylemore tussen Stellenbosch en Franschhoek) word goed onderhou en my gunsteling-paadjie is bergop na die waterval. Begin reeds vroegdag stap, veral in die somer. Dagpermitte kos R60 per persoon en kan gekoop word by die bewarea se kantoor by Plaisir de Merle-wynlandgoed, langs die R45.
Die Fernkloof-natuurreservaat is in die berg agter Hermanus. Dis maklik bereikbaar, veilig en kos net mooi niks. Jy stap tussen fynbos, sien voëls en kan in een van die damme bo swem.
Wanneer ek in die Sederberg wil kamp, maar nie tyd het om diep in die berge in te ry nie, mik ek reguit vir Beaverlac buite Porterville. Hier is klomp watervalle en ongelooflike rotspoele vir swem. Plus, hier’s nie selfoonsein nie – perfek as jy wil prop uittrek om jou kop reg te kry.
Op soek na ’n avontuurlike roete? Die Miaspoort-roete (Limietberg-natuurreservaat) begin aan die Paarl-kant van die Dutoitskloofpas. Jy stap eers in ’n mooi klofie op en
(’n redelike ruk later...) bereik jy Hugenotepiek (1 318 m). Stap ’n ent verder tot by die sogenaamde Italian Cross, opgerig in 1945 om die Italiaanse krygsgevangenes te gedenk wat gehelp het om die Dutoitskloofpas te bou. Jy moet ’n permit by Cape Nature uitneem om die roete te stap.
Nog ’n goeie bergplek is Mont Rochelle-natuurreservaat buite Franschhoek. Ons het eers opgeklim tot op Dutoitskop (1 407 m), en daarna Perdekop (1 575 m) aangedurf. Dis die hoogste piek in die reservaat en van bo af sien jy ’n gebied genaamd The Wall (dis eintlik die Wemmershoekpiek, en ander rondom dit) en die vallei doer onder. Die stilte en vreedsaamheid staan in skerp kontras met die geklingel en gewoel van Franschhoek ver onder jou.