SOPHIA VAN TAAK
“Die Tafelberg- nasionale park is waarskynlik die mees toeganklike reservaat in die land. Hier’s meer staproetes as dassies en die meeste daarvan is gratis. Stap vroegoggend of laatmiddag die Kloof Corner-roete en kyk hoe die son oor die stad opkom of in die see sak.
“Die roete begin in Tafelbergweg naby die Kloofnek-watersuiweringsaanleg en gee jou ’n puik uitsig sonder dat jy tot heel bo-op die Tafel hoef te piekel.
“Ná slegs twintig minute sit jy op ’n rotsblok op die hoek van die berg. Na regs lê die stadskom, en doer in die dynserigheid die Swartland en Boland se berge. Reg voor jou staan Leeukop. En kyk jy links, strek die Atlantiese Oseaan tot in alle ewigheid uit.”