NAMAKWA- NASIONALE PARK
Namakwaland is bekend vir sy jaarlikse blommeskouspel in Augustus en September. Bring jou kamera, visstok, bergfiets, stapskoene, voëlgids en verkyker – die park het baie meer om te doen as net blomme kyk!
DOEN DÍT Die beste deel van die park om blomme te sien is by Skilpad. Stap die Skilpadroete (5 km) van die ontvangskantoor af of ry die 5 kmsirkelroete en trek af by die Dak van Namakwaland-uitkykpunt. Bewaringstarief R50 p.p.; R25 per kind 2-11 jaar; gratis met ’n Wild Card.
VERBLYF Die Skilpad-ruskamp het vier selfsorgchalets. Vanaf R800 p.n. vir 2 volwassenes, plus R290 p.p. ekstra en R145 per ekstra kind 2-11 jaar.
Die kuskampe (Delwerskamp, Groenriviermond, Kwass se Baai, Varswater, Bamboeskamp, Skuinsklip, Koringkorrelbaai, Skuinsbaai Noord en Boulderbaai) het geen water, krag, skadu of selfoonopvangs nie.
Elke staanplek het ’n beskutte braaiplek en hier is gemeenskaplike puttoilette. R175 p.n. (maks. 6 mense per staanplek)
Twee tentkampe word tydelik in die blommeseisoen by Skilpad en die Groenriviermonding opgeslaan. Hulle is oop van 19 Augustus tot 18 September 2022. Elke luukse tent het slaapplek vir 2 mense en die kamp het ’n gemeenskaplike tent, warmwaterstorte en chemiese toilette. Ontbyt, namiddagtee en ’n driegang-aandete is ingesluit. Vanaf R2 970 p.p. wat deel. Bespreek jou tent: 083 652 5489; 071 260 6367 (Charmane Johnston); flowercamps.co.za
Waar? Sowat 50 km suidwes van Springbok.
Kontak 027 672 1948