BEDERF JOUSELF
Klein JAN, Tswalu Kalahariprivaatwildreservaat
Tswalu is ’n eksklusiewe reservaat sowat 82 km suidoos van Van
Zylsrus en die klem is op luukse ekotoerisme – jy gaan op safariuitstappies met jou eie gids en spoorsnyer, kry spa-behandelings en lê weg aan spogetes. Die verblyftariewe sal jou oë laat traan en geen dagbesoekers word toegelaat nie, maar as jy Tswalu op ’n klein skaal wil beleef, kan jy by die Klein JAN-restaurant middagete eet.
Jan Hendrik van der Westhuizen is Suid-Afrika se eerste Michelinbekroonde sjef en hy bedryf hierdie restaurant in die reservaat. Besprekings word drie maande vooruit vir spesifieke datums geneem. R2 500 p.p. vir ’n proespyskaart met sewe gange en aanbevole wyne. reservations@ restaurantkleinjan.com
Ek wíl in die reservaat bly! Hier is twee luukse kampe: The Motse het slaapplek vir 24 mense in 9 suites en die Tarkuni-plaashuis het 5 kamers en slaapplek vir 10 mense. Vanaf
R30 500 p.p. wat deel. 053 781 9331 (besprekings); tswalu.com