DLINZAWOUD-NATUURRESERVAAT
Dié woud is ’n moet vir voëlkykers – soek skaars spesies soos die withalsbosduif, bloukuifloerie en natallyster. Dlinza is deel van die Zululand Birding Route wat ander inheemse woude insluit soos Ongoye en Ntumeni, asook klein reservate soos Amatikulu.
DOEN DÍT Die Dlinzawoud-plankiespad is 125 m lank en 10 m hoog en dis heerlik om deur die boomtoppe te stap. Aan die einde van die pad is ’n 20 m hoë dek waarop jy kan sit en oor die woud uitkyk terwyl allerhande voëls rondom jou saamgesels. Jy kan ’n voëlgids vra om saam met jou te stap – dis gratis, maar bespreek vooraf.
Hier is ook twee ander staproetes om te volg – Impunzi (1,3 km) en Unkonka (1,8 km). Wees op die uitkyk vir die klein blouduikertjies. Bewaringstarief R40 p.p.; R10 per kind.
Waar? In Kangelastraat, Eshowe.
Kontak 035 474 4029