ONS KENNER
“KWAZULU-NATAL is vol interessante kleiner reservate. As jy verby die soms gehawende geriewe en ellendige paaie kan kyk, is daar heelwat geskiedenis en biodiversiteit om te ontdek. Drie van my gunstelinge is Spioenkop-natuurreservaat
( 036 488 1578) op die oewer van die Spioenkopdam naby Bergville, Oribi Gorge-natuurreservaat ( 072 042 9390) naby Port Shepstone, en die Umtamvuna-natuurreservaat ( 082 559 2864) naby Port Edward.
“Spioenkop het ’n mooi landskap: doringboomvlaktes lê in die skadu van die Drakensberg, en die bekende koppie waarna die reservaat genoem is, toring oor die dam. Ry na die slagveld bo-op die koppie nadat jy sebras en wildebeeste op jou lysie afgemerk het. Daar is ’n monument wat die soldate (meestal Britte) gedenk wat tydens die Slag van Spioenkop in 1900 gesneuwel het.
“Oribi Gorge vang jou ook onkant – daar is paadjies en uitkykpunte al langs die kant van hierdie diep, beboste ravyn. Daar is ’n waterval en die Umzimkulwanarivier blink onder in die ravyn. Ek was heel gelukkig om die ravyn net met my kamera te verken, maar as jy meer avontuurlustig is, kan jy by Wild5Adventures ( 082 566 7424; wild5adventures.co.za) aanklop en net buite die reservaat aan ’n harnas oor die ravyn swaai...
“By Umtamvuna is ’n dramatiese ravyn ook die groot trekpleister. Die Umtamvunarivier vorm die grens tussen KWAZULU-NATAL en die Oos-Kaap en jy kry daai Wildekus-gevoel wanneer jy langs die ravyn stap – die lug is net so grys en drukkend en die subtropiese plantegroei ook so groen.
“Daar is wonderlike stappaadjies in die reservaat en jy kan ook die plato op jou bergfiets verken op Clearwater Trails ( 083 549 6710;
clearwatertrails.co.za) se roetes – hulle sal jou goeie raad kan gee oor die beste stap- of bergfietsroetes.”