ANDER RESERVATE IN GAUTENG
Die Tswaing-natuurreservaat is sowat 40 km noordwes van Pretoria. Tswaing – dit beteken sout in Setswana – is Suid-Afrika se enigste kratermeer en het sowat 220 000 jaar gelede gevorm toe ’n meteoriet die aarde getref het. Die reservaat het wild en voëls en die 7,2 km lange Tswaing-kraterroete neem jou rondom die krater se rand en af na die pan in die middel. Jy kan dit op jou eie stap of saam met ’n gids. Groepsverblyf beskikbaar. Bewaringstarief:
R40 p.p.; R25 per kind. Begeleide stap R50 p.p. 073 661 5014 (Ditsong-Tswaing-kratermuseum)
Die Groenkloof-natuurreservaat is in Christina de Wit-laan, Groenkloof. Dis in die Fonteinevallei en het ’n uitgebreide netwerk stap- en bergfietsroetes. Wees op die uitkyk vir die swartwitpense, maar moet dit nie te naby waag nie – hulle storm soms. Jy kan ook op wildritte en perdryuitstappies gaan. Oornaggeriewe. Bewaringstarief: R49 p.p.; R31 per kind 7-17 jaar; R16 per kind jonger as 6. 012 358 1757
Die Somabula-natuurreservaat is sowat 8 km suid van Cullinan.
Hierdie privaatreservaat het nie groot roofdiere nie en jy kan rondry en stap om die diere te sien – hier is meestal boksoorte. Hier is 4x4-roetes en jy kan voëlkyk. Verblyfopsies sluit kampplekke, chalets en selfs ossewaens in! Dagbesoekers mag hier kom stap en die lapa gebruik, maar moet vooruit bespreek – R50 p.p.; R100 vir die lapa. 082 550 1892
Die Modderfontein-reservaat is in Ardenweg, Modderfontein. Die piekniekterrein bars uit sy nate oor naweke wanneer gesinne en vriende hier bymekaarkom om vis te vang en partytjies langs die Visarenddam te hou. Dié reservaat van 265 ha is in privaatbesit en het drie damme en roetes waarlangs jy kan draf en fietsry. Taroko Farm ( tarokofarm. co.za), net langs die reservaat, het ’n restaurant, ’n organiese tuin en ’n amfiteater en die Fourways-boeremark word hier gehou. Bewaringstarief: R35 p.p.; R20 per kind. 081 351 1223; modderfonteinreserve.co.za
The Wilds is in Houghtonrylaan, Houghton. Dis ’n verrassende klein munisipale reservaat tussen die koppies in die hartjie van Johannesburg se middestad. Dis onlangs opgeknap en is nou ’n veilige tuin en buitelugkunsgalery – kom hierheen as jy die stad se gewoel wil ontsnap.
Gratis toegang. 011 643 2313
Die Suikerbosrand-natuurreservaat is langs die R550 in Heidelberg. Dis ’n klassieke Hoëveld-bestemming en ’n goeie plek om jou bene te rek – hier is dagstappe en ’n oornagroete (66 km). Jy kan ook teen Toringkop (1 913 m), die hoogste punt in Gauteng, opklim vir uitsigte oor Johannesburg se stadslyn. Hutte vir stappers. Bewaringstarief: R45 p.p.; R35 per kind jonger as 12; R35 per voertuig. 011 439 6300