MARICO-BIOSFEERRESERVAAT
Die Marico-biosfeerreservaat beslaan die opvangsgebied van die Maricorivier, maar ook dele van die Elands-, Molemane- en Moloporivier. Die beste manier om die gebied te ervaar is om iewers naby die dorpie Groot-Marico oor te bly. Hier is van ons gunsteling-plekke in die omgewing:
Die RiverStill-gasteplaas ( 014 503 0085; riverstill.co.za) is net suid van die dorp. Gaan sit langs die rivier en jy sien dalk een van sy sku inwoners soos ’n otter of ’n watertrapper.
Die Evergreen River-gasteplaas ( 014 503 1057; evergreenguestfarm. co.za) is verder stroomop en het netjiese kothuise en ’n nuwe kampterrein.
The Hanging Garden ( 082 554 5651; troy@thehanginggarden.co.za) sit op ’n rant hoog bo die rivier en kyk uit oor die veld.
Die wonderbaarlike Marico-oog is sowat 35 km suid van Groot-Marico – dis die oorsprong van die rivier. Dis soos ’n enorme akwarium en jy sal visse sien en tussen waterlelies swem. Bring jou snorkel en duikbril om die helder water van die oog te verken. Dagbesoekers betaal R50 p.p. of R80 p.p. as jy wil snorkel- of skubaduik – hulle het ook basiese verblyf en kamp ( 084 512 9185; marico-oog.co.za).
Die Enzelsberg is ’n minder bekende wilde hoekie van Noordwes. Dit is sowat 20 km noordoos van Zeerust. Hier is verskeie smal klowe waar luiperds hou en maroela-, wildevy-, moepel en doringolmbome dig op mekaar groei.
Bly by Diep ini Bos ( 083 555 6953; Tersia) en stap in die Watervalkloof. Ancient City ( 073 715 0882; kaditshwene.com) is op die plaas langsaan – hier kan jy die ruïnes van ’n ganse stad genaamd Kaditshwene sien, waar sowat 20 000 Bahurutshe vroeg in die 19de eeu gewoon het.