ONS KENNER
“Die Wolkberg-wildernisgebied (Seralabosboustasie 0152769909; reservations.lwr@ledet.gov.za)is22000ha groot. Dis naby Haenertsburg en bied watervalle, helder poele, digte woude en imposante rotsformasies soos Kruger se Neus, Die Horings en die Duiwel se Kneukels. Die uitsigte slaan jou asem weg!
“Dis ook enige natuurliefhebber se droom. As jy hou van diere, kan jy samangoape, bosvarke en die sku rooiduiker sien; voëlkykers kan spesies soos die woudpapegaai, blouswael en rooibektiptol afmerk; botaniste kan die endemiese wolkbergbroodboom en wolkbergdrakeboom soek; reptielkundiges kan die wolkbergdwergverkleurmannetjie bekyk; en hier is vele goggas om insektekundiges gelukkig te hou.
“Die beste manier om die gebied te sien is te voet, maar die landskap moenie onderskat word nie. Wolkberg vorm die noordelike punt van die Drakensbergreeks en die weer kan onvoorspelbaar wees – die mis kan vinnig inrol en besoekers moet op alle weersomstandighede voorberei wees. Dis maklik om af te dwaal in die diep valleie en kitsvloede kom gereeld voor – ’n paar stappers is al in dié berge oorlede. Dis wild en gevaarlik en dis raadsaam om saam met ’n gids of iemand wat die gebied goed ken, te stap.”