PANORAMAROETE
Die meeste besienswaardighede op hierdie toerismeroete in die hooglande van Mpumalanga is in en rondom die Blyderiviercanyon-natuurreservaat. Hier is van die hoogtepunte in die gebied:
Die Graskop Gorge Lift Company ( 066 305 1572; graskopgorgelift company.co.za) is net buite Graskop op die R533 na Hazyview. Hier kan jy met ’n glashysbak sowat 51 m in die Graskop-ravyn afdaal en ’n 600 m lange sirkelroete deur ’n afromontane-woud stap. R225 p.p., R145 per kind 4-16 jaar. Bykomende bewaringstarief R50 p.p.; R25 per kind. Jy kan ook oor die ravyn gly op ’n 120 m lange foefieslaaid (R250 p.p.) of die Big Swing (R550 p.p.) aandurf.
Van Graskop af volg jy die R532 al langs die Drakensbergse platorand. Draai af op die R534-luspad om die Pinnacle-rots (toegangstarief: R25 p.p.; R20 per kind), die God’s Window-uitkykpunt met ’n uitsig oor die Laeveld (toegangstarief:
R20 p.p.; R15 per kind) en Wonder View (gratis), die hoogste uitkykpunt in die gebied, te sien.
Keer terug na die R532 en kyk vir bordjies na die Lisbon-waterval (sien kassie langsaan) en die Berlyn-waterval sowat 2 km verder – dis ’n kort entjie se stap van die parkeerterrein na die uitkykpunt by laasgenoemde waterval. Toegangstarief : R16 p.p.
Die samevloeiing van die Treur- en Blyderivier is sowat 35 km noord van Graskop. Die malende waters het oor die eeue die klip hier weggevreet en die Bourke’s Luck-kolkgate (R65 p.p.; R25 per kind) gevorm.
Die Blyderivier vloei hier in een van die mooiste canyons in die land in. Sandsteenkranse toring hoog bo die rivierbedding uit. Trek af by die Laevelduitkykpunt (gratis) vir ’n uitsig oor die canyon en die Blyderivierpoortdam. Mariepskop verrys in die ooste. Die Drie Rondawels-uitkykpunt (R35 p.p.; R20 per kind) is sowat 4,6 km verder.
Sluit jou avontuur af met ’n bootvaart (90 minute) op die Blyderivierpoortdam – jy kan die Kadishi-waterval, wilde diere en die Drie Rondawels sien. R260 p.p.; R150 per kind 2-12 jaar. Bewaringstarief: R35 p.p. R20 per kind 6-12 jaar.
Bespreek by die Blyde Canyon Adventure Centre: 015 795 5961;
blydecanyon.co.za
Hier is baie verblyfopsies in die gebied. As jy graag wil kamp, bly by een van die twee Forever Resorts naby die Blyderivierpoortdam.
Blyde Canyon 086 122 6966; foreverblydecanyon.co.za
Swadini 015 795 5141; foreverswadini.co.za