ONS KENNER
“Wanneer jy die Panoramaroete van Sabie tot by Graskop en verder noord ry, kan jy by een van die vele watervalle en rotspoele stilhou om piekniek te hou en te swem. Een van my gunstelinge is die MacMac-poele (toegangstarief: R36 p.p.), 18 km suid van Graskop – daar is ’n rits helder rivierpoele en klein watervalle. Die toilette, braaiplekke en tafels is netjies en hier is genoeg plek vir almal. Die Sekretarisvoël-staproete (3 km) begin hier en loop deur grasveld en kolle inheemse woud.
“Die Lisbon-waterval is 9 km noord van Graskop en vir my die mooiste van almal. Daar is ’n parkeerterrein en snuistermark aan die bopunt en ’n netjiese uitsig, maar dis die moeite werd om die 40 minute tot by die onderpunt te stap. Van onder af kan jy sien dat Lisbon eintlik uit drie watervalle bestaan.
“Al honger en moeg? Stop by The Chubby Pig ( 076 041 3835) sowat
4,5 km voor die Bourke’s Luck-kolkgate – hier kan jy iets eet, geskenke en plante koop, en in selfsorgkothuise langs die Treurrivier oorslaap.
“As jy graag die gebied te voet wil verken, kan jy die bekende Fanie Botharoete (EcoTrail SA 082 663 6168; info@ecotrail.co.za) van Sabie na Graskop stap: Jy lê 40 km oor drie dae af.”