LOSKOPDAM-NATUURRESERVAAT
Die Loskopdam is in 1939 gebou en heelwat plase stroomaf in die Olifantsriviervallei is daarvan afhanklik vir besproeiing. Die reservaat is ’n gewilde kamp- en visvangplek en die jaarlikse Loskop Kurper Bonanza vind gewoonlik in Maart plaas. Pasop: Hier is krokodille en seekoeie in die dam.
DOEN DÍT Selfs sonder jou verkyker sal jy voëls soos geelbekneushoringvoëls, kwêvoëls, gevlekte lysters en rooibekkakelaars in die Forever Resort se kampterrein sien, maar gaan ook op ’n wildrit teen die noordelike oewer van die dam – jy kom dalk ’n witrenoster teë! Bewaringstarief R60 p.p.; R25 per kind.
VERBLYF Loskopdam Forever Resort is die beste opsie. Kamp (met krag) vanaf R260 p.n. vir 2 mense. Selfsorgchalets en houthuisies vanaf R975 p.n. vir 2 mense. Huise (slaapplek vir 6 mense) vanaf R2 155 p.n. Gastehuise (slaapplek vir 8 mense) vanaf R2 995 p.n. Die pryse styg oor naweke – jy moet dan ook ten minste twee aande oorbly (kamp uitgesluit).
Waar? Sowat 57 km noord van Middelburg, op die grens tussen Mpumalanga en Limpopo.
Kontak Loskopdam Forever Resort
foreverloskopdam.co.za 013 262 3075;