GRYP JOU KAMERA, NAMIBIË SE SUIDE WAG!
Wil jy foto’s neem net soos Weg se fotograwe? Hier is jou kans om jou fotografievaardighede te slyp en terselfdertyd die vakansie van ’n leeftyd te beleef in een van die mooiste plekke ter wêreld!
Asjyal Weg se aanlynfotokursus voltooi het, jou eerste kamera aangeskaf het of bloot meer wil leer oor landskap-, wild- en reisfotografie, is dié toer vir jou!
Hierdie toer is deels fotowerkswinkel en deels begeleide padreis. Jy bring hope tyd deur by al die fotohoogtepunte in die suide van Namibië waar Evan Naudé, een van Weg se gereelde fotograwe, jou touwys maak.
REISPLAN
DAG 1 Die toergroep ontmoet mekaar by die Canyon Roadhouse digby die Visriviercanyon.
DAG2&3 Ná ’n vroegoggend besoek aan die canyon mik ons vir Lüderitz. Langs die pad stop ons by die spoorwegdorpie Aus, die wilde perde op die Garubvlaktes en vele fotogeleenthede tussenin.
Die volgende dag verken ons Kolmanskop en Lüderitz.
DAG4&5 Vandag ry ons terug na Aus en vandaar met ’n grondpad tot by die At Kronenhof Lodge. Die volgende dag fokus ons op landskapfotografie en besoek ons die Duwisib-kasteel.
DAG6&7 Sesriem is ’n hoogtepunt vir enige fotograaf! Ons bly twee aande in ’n lodge binne die parkhekke, wat beteken dat ons voor sonop en tot ná sononder in die park mag wees. Sodoende kan ons Sossusvlei, Dooievlei en die magiese duine van die Namibwoestyn in die beste oggend- en namiddaglig afneem! Ons besoek ook die Sesriem-canyon.
DAG8&9 Vandag ry ons na Swakopmund en stop by Solitaire vir apfelstrudel voor ons deur die Gaub- en Kuisebpas kuswaarts ry. Die volgende oggend ry ons na Sandvishawe, ’n beelskone strandmeer tussen die duine. Ons is net ná middagete weer terug in Swakopmund, waar ons ons laaste aandete eet.
DAG 10 Ná ontbyt sluit die toer af en ons groet met herinneringe van ’n onvergeetlike toer en
’n kamera vol skitterfoto’s!