VOERTUIGLISENSIE

Die beste plek vir jou lisensieskyfie is die woonwa se agterruit (fig. 1). As jy een van die nuwer waens sonder ’n agterruit het, kan jy dit in een van die ander ruite plak, solank die verkeersmense dit maklik kan sien. Vir ’n sleepwa moet jy ’n ronde lisensieskyfhouer op die A-raam hê (fig. 2). ’n Inligtingsplaatjie met die wa se gesertifiseerde bruto voertuigmassa (BVM) en bruto asmassa (BA) moet vertoon word – gewoonlik ook op die sleepwa se A-raam. As jou wa se lisensie verval, mag jy nog 21 dae lank wettig sleep voordat jy in die ry moet gaan staan om ’n nuwe een te kry.