Help ’n bietjie daar
Ek en my kollegas is reisjoernaliste. Nié reisagente nie. Ons het egter ’n effense idee hoe dit moet voel om laasgenoemde te wees, want daar beland weekliks tientalle e-posse by ons wat almal min of meer dieselfde strekking het: “Waar kan ons gaan kamp naby (bestemming) waar dit netjies is met ’n warmwaterswembad en skoon badkamers? Dit moet ’n lekker plek wees en die pad moet mooi wees en hoeveel kos dit en watter nommer moet ons bel en is daar mense wat ons kan help met die tent?” (sic)
Dis nie dat ons onwillig is om te help nie, maar dit is nogal ’n tydrowende besigheid en dan moet ons boonop raai oor wat jou idee van ’n “lekker” plek is.
Die 2018-weergawe van ons immergewilde Oordgids maak dus die lewe vir ons almal makliker. Vanjaar het ons besluit om 100 kampplekke reg oor SuidAfrika te kies om jou te help besluit waar jy volgende gaan kamp. Of dit nou vir Paasnaweek, die wintervakansie, ’n vinnige wegbreeknaweek of ’n oornagplek langs die pad is, tussen dié uitgesoekte oorde behoort jy geholpe te raak, waarheen jy ook al op pad is.
Onthou, die Oordgids is nie ’n ranglys nie... nommer 24 is nie noodwendig beter as nommer 25 nie. Dit is bloot ’n lys van 100 oorde versprei oor al nege provinsies wat ons beïndruk het toe ons oor die laaste klompie jare daar gekamp het. Dit wissel van supergesinsoorde met waterwurms, trampoliens, minigholfbane en vakansievermaak tot stil wegkruipplekkies en alles tussenin.
By elke oord vertel ons jou hoe dit lyk, wat daar is, waar dit is en hoeveel dit kos asook die kontakbesonderhede vir wanneer jy wil bespreek. Nou kan jy jou jaar behoorlik beplan en nie wonder oor wat op jou wag by jou volgende kampbestemming nie.
Veilige reis!