Errenta aitorpena euskaraz egiteko deia

UEMAK abiatu du kanpaina Baztan, Arantza, Bera, Etxalar eta Igantzin

BERA – UEMAK, bertako kide diren Bortzirietako udalekin (Bera, Etxalar, Arantza eta Igantzi) eta Baztango Udalarekin elkarlanean, errenta aitorpena euskaraz egiteko kanpaina jarri du abian aurten ere. UEMATIK harago doa elkarlana, Mankomunitateko kide ez diren beste zenbait udalek ere parte hartuko baitute.

Herritarrek administrazioarekin dituzten harremanak euskaraz izan daitezen bultzatu nahi da. Bide horretan, errenta aitorpena euskaraz eginda euskarari bide berriak irekitzeaz gain, administrazioaren euskalduntzea ere bultzatzen da. Hizkuntzaren normalizazioa lortzeko euskara eremu guztietara hedatu behar da, eta garrantzitsua da herritarrek euskaraz osotasunean bizitzeko hautua egitea. Udalerri euskaldunetako herritarrak eredu eta aitzindariak izan daitezke horretan.