Tantirudantza jaialdia igandean izanen da Lesakan
Herrikoekin batera, Bera, Zumaia, Ibarra eta Lezoko ehun dantzari inguru espero dituzte
LESAKA – Lesakako Tantirumairu euskal folklore taldeak antolatutako Tantirudantza jaialdia eginen dute apirilaren 22an. Herriko dantzari ttikiekin batera, Berako Gure Txokoa, Zumaiako Txori Txiki, Ibarrako Alurr eta Lezoko Murixka taldetakoak izanen dira. “Denera ehun dantzari baino gehiago espero ditugu”, adierazi du Garbiñe Sarasola, Tantirumairu euskal folklore taldeko arduradunak. Kontuak galduak badituzte ere, hogei urte baino gehiago daramazkite jaialdia antolatzen. “Hasieran jaialdi handi batekin hasi ginen –dio Sarasolak–, baina gero zerbait xumeagora jo genuen eta azken urteetan egitura hori errepikatu dugu”.
Igandean, 10.00etan taldeei ongietorria egin ondotik, karrikaz karrika ibiliko dira, bakoitza bere ibilbidea eginez eta beraien dantza saioak eskainiz. 12.15ean Zubigainekoa eskainiko dute herriko dantzari ttikiek Onin erreka bazterrean eta gero, plazan eginen dute jaialdia talde guztiek batera. Emanaldi horren ondotik, kanpoko taldeetako dantzari ttikiek herrikoen etxe eta elkartetan bazkalduko dute. Arduradun eta musikariek, berriz, elkarrekin bazkalduko dute. Bazkalondoan, 17.30ean Ttipika dantza gidatuak izanen dira plazan (euria eginen balu frontoian). MUSIKA GEHIAGO Igandean, dantzariekin batera ibiliko diren musikarienak ez dira izanen asteburuko doinu bakarrak. Larunbatean 17.30ean Txamukos Mariatxiak aditzeko aukera izanen dute Andra Mari Zahar-etxeko bizilagunek. Gainera, Txamezan mukos taldearekin afari mexikarra ere izanen dute Irubide jatetxean.
Egun berean, larunbat arratsaldeko 7.30ean, Erronkariko Julian Gayarre abesbatzaren emanaldia antolatu du Lesakako Abesbatzak elizan, udalaren laguntzarekin. abestuko dute eta ondotik kontzertua eskainiko dute. Gero, ekainaren 17an, Lesakako Abesbatza Erronkarira joanen da bertze kontzertu bat ematera eta honekin bukatuko dira bi abesbatzak elkarrekin egin behar dituzten ekitaldiak.