Dena prest Haur eta Gaztetxoen Kantarien Jaialdi Nagusirako
Nafarroako 15 ikastetxetako taldeek emanaldi aberatsa eskainiko dute Barañaingo Auditorioan
IRUÑEA –Dena prest dago ikuskizunari hasiera emateko. Nafarroako ikastetxe eta ikastoletako ikasle taldeak oholtzaratzea eta euskal musikari bultzada ematea helburu duen Haur eta Gaztetxoen Kantari Jaialdi Nagusia ospatuko da gaur Barañaingo Auditorioan, arratsaldeko 18.00etan.
Jaialdiaren azken emanaldi honetan, 15 zentrotako 291(165 abeslari eta 26 instrumentu jole) partaide arituko dira. Denetara, 15 abesti eskainiko dituzte ikasleek publiko zabalaren aurrean. Tafallako Garcés de los Fayos Ikastolako musika irakaslea den Amaia Dominguez ekitaldiaren antolatzaile nagusiak, Nafarroako Gobernuaren laguntza izan du azken emanaldi honen prestaketa lanetan. “Oso emanaldi aberatsa izango da, adin deberdinetako partaideekin eta kanta mota desberdinekin”, adierazi du Dominguezek.
Hala, Lesakako Tantirumairu Ikastola, Baztan Ikastola, Jaso Ikastola, Lekunberriko Aralar Musika Eskola, Orkogiengo Auzalar eskolako abesbatza, Altsasuko Iñigo Aritza Ikastola, Lakuntzako eskola eta San Saastin Musika Eskola, Azpilikuetako talde bat, Oibarko hirukote bat, Ibaialde Ikastola, Zarrakasteluko Eskola, tafallako Ikastola eta Tafallako bikote bat izanen dira ikuskizunean parte hartuko dutenak.
Gaurko emanaldian, partaideak bakarka, bikoteka edo taldeka arituko dira, musika tresnekin edo grabazioekin, karaoke formatuan. Taldeen eraketari dagokionez, bi bakarlari, bikote bat eta hamaika talde izanen dira oholtzaratuko direnak.
Abestiei dagokionez, denetarik entzuteko parada eskainiko da. Lluis Llachen Agure zaharra abesti ospetsutik hasi eta En Tol Sarmiento taldearen Musikaren doinua-ra, Go!azen musikaleko Denok zu bezalako kantuetatik pasatuz. Ez dira euskal musikako klasikorik faltako, erraterako, Lourdes Iriondoren Ez gaude konforme edo Sagarra jo abestia. Berrikuntzen artean, Lekunberriko Aralar Musika Eskolakoek Argi bat da kantua eskainiko dute, City of Stars ospetsuaren euskarazko bertsioa. Azpilkuetako Nerea Arregik, halaber, berak konposatutako Bada garaia kantua joko du, pianoaz.
Dominguezek azpimarratu bezala, ekitaldiaren helburu nagusia Nafarroako haur eta gazteen euskararekiko eta kantuarekiko zaletasuna piztea da, aldi berean elkarlana sustatu eta ikastetxeen harteko harremanak sakonduz, “norberaren gaitasun artistikoa kanporatuz eta musikarekin gozatuz”.
Tafallara iritsi aurretik, Haur eta Gaztetxoen Kantari Jaialdia Berako Kultur Etxetik, Antsoaingo Antzokitik, Altsasuko Iortia Kulturgunetik eta Oibarko Álvaro Aldunate Entzutegitik igaro da, areto guztietan ikusego zabala bilduz. Antolatzaileak gogoratu duenez, horietako bakoitzean tokian-tokiko udalaren “ezinbesteko” laguntza jaso du. “Beraiek gabe ezingo litzateke hau guztia burutu”. ●