‘Maximiliano, Ipuin kontalaria’ haurrendako antzerkia gaur, Nafarroako Antzerki Eskolan
Xabier Artiedaren lanak, Haurrendako Euskarazko Antzerki Testuen lehiaketa irabazi zuen iaz
IRUÑEA – Xabier Artiedaren Maximiliano, Ipuin kontalaria antzezlana estreinatuko da gaur, Nafarroako Antzerki Eskolan (NAE), arratsaldeko 18.30ean. 2017an, Iruñeko Udalak eta NAEK antolatzen duten Haurrendako Euskarazko Antzerki Testuen lehiaketa exaequo irabazi zuen lanetako bat da. Sarrerak 6 euroan eros daitezke jada Naeren webgunean (www.laescueladeteatro.com) eta antzokiko leihatilan bertan, ikuskizuna hasi eta ordu eta erdi lehenagotik.
Maximiliano, Ipuin kontalaria Xabier Artiedak idatzi eta zuzendu du, eta Nafarroako Antzerki Eskolak ekoiztu. Argumentuak ipuinen ahalmen eraldatzailea du ardatz. Aitor, Oihane, Amets eta Nagore dira protagonistak, arratsaldero, ikastola amaitu eta gero, elkarrekin jolasean aritzeko biltzen den haur taldea. Baina egun horretan, Nagore opari berri batekin etorriko da: futbol pilota bat. Guztiak zein trebeak diren erakusteko irrikaz egongo dira, poz-pozik. Batez ere Aitor, zeinak baloiari kristoren ostikoa eman eta urrutira bidalita, tokiko haurren esanetan misteriotsua eta arriskutsua omen den agurearen leihoetako bat puskatuko baitu. Lagun-taldeak barrura sartu beharko du baloia berreskuratzeko, eta baloiaz gain beste hainbat sorpresa aurkituko ditu bertan.
Laura Villanueva, Guillermo López, Maitane Goñi, Jaione Urtasun eta Xabier Flamarique dira aktoreak. Luz y Fer eta Atornapión, hurrenez hurren, argiztapenaz eta eszenografiaz arduratzen dira, eta María Sagüés eta Leire Mendizábal, jantziez.
ESKOLA KANPAINA Iruñeko Udaleko Kultura eta Hezkuntzako Alorreko zuzendari Maitena Muruzabalek, testuaren egile eta antzezlanaren zuzendari Xabier Artiedak, ekoizpenaren koordinatzaile eta Nafarroako Antzerki Eskolako irakasle Maite Sagüések, eta antzezlaneko aktore Jaione Urtasunek estreinaldiaren berri eman zuten atzo.
Adierazi zutenez, eskola-kanpaina bat ere abiatuko da, antzezlanaren ekoizpenari eta estreinaldiari jarraipena emateko, datorren astean zehar (apirilaren 23, 24 eta 25ean), Iruñeko Udalak eta Nafarroako Antzerki Eskolak elkarrekin antolatuta. Kanpaina horren barruan gehienez ere sei emanaldi eskainiko dira. Parte hartu nahi duten ikastetxeak garaiz dabiltza oraindik izena emateko, Nafarroako Antzerki Eskolan bertan eta 948 229 239 telefonoan.