Josetxo Huarte: pala eskuan eta lehiatu munduan
Kalifornian sortutako baztandarrak, Munduko Pilota Txapelketan jokatuko du, Bartzelonan, Ameriketako Estatu Batuekin
ELIZONDO – Atzo hasi zen Bartzelonan Munduko Pilota Txapelketa. Lau urtetik behin ospatzen den lehiaketa, larunbatera bitartean jokatuko da, Vall d’hebrongo kirol instalazioetan. XVIII. edizioa dute aurten Munduko Txapelketek. 14 herrialde desberdinetako pilotariak, 14 modalitate desberdinetan nor gehiago ariko dira, domina preziatuen bila. Lehian ariko den pilotari horietako bat, Josetxo Huarte Oskariz arizkundarra da. Baztandarrak pala eskuan jokatzen du, ezker-eskuin pilota astinduz. Baztandarra izanagatik, Ameriketako Estatu Batuetan sortua da, eta bertako selekzioarekin jokatuko du txapelketa.
Ez da bere lehenbizikoa izanen, hirugarren aldiz parte hartuko du Munduko Txapelketan, Pauen eta Mexikon aritu ondotik. Ambrosio eta Mari Cruz, gurasoak, arizkundarrak dira eta aita ameriketan artzain egon zenez, Josetxo, baita bere anai-arrebak ere, Tony eta Elisa, ozeanoz bertzalde sortuak dira. San Franciscon bizi ziren eta urtero Baztanera itzultzen baziren ere, 10 urte zituen arte Kalifornian bizi izan ziren. Pilotarekiko afizioa aitarengandik jaso du, dioenez, Euskal Etxetik 5 minutura bizi ziren eta aita astero behin baino gehiagotan aritzen zen bertako pilotalekuan. Josetxo eta Tony, anaia, berarekin joaten ziren eta han hasi ziren pilotan jokatzen. Eskuz, gehienbat. Zaletasun horrekin segitzen du Josetxok, eta bihartik aitzinet Bartzelonan dena emateko prest dago. Marmolarekin lan egiten duen enpresa batean aritzen da Josetxo, eta pilotariaren
eta marmolaren alderaketa egin dezakegu, gogorra bezain sendoa dugu bata zein bertzea, eta mineralaren dotorezia ere bere baitan du pilotari baztandarrak, bai pertsona bezala, baita pilotari bezala ere. Ikusi beharko dugu, Bartzelonako pilotalekuen frontisak marmolezkoak diren, hala bada, etxean bezala lehiatuko da Josetxo.
Josetxorekin bikotea osatuko duen Agusti Bruguesen historia ere bitxia da. Katalunian sortua da, etxean bezala ariko da aurtengo txapelketan, izan ere, 16 urtetik, Vall d’hebrongo klubean aritzen da. Agustiren aita kataluniarra da, baita aitatxi ere eta biak pilotariak izandakoak dira, aita, gainera, gaur egun Kataluniako pilota federazioko lehendakaria da. Bitxikeria ez da hortik heldu, kontua da, Agustik, Josetxorekin batera Ameriketako Estatu Batuetako selekzioa ordezkatuko duela, eta ez duela inoiz lurralde hartan hankarik jarri. Ez. Ama hangoa du, eta hortik datorkio nazionalitate bikoitza. Paletan, larruzko pilotarekin, Frantziar estatuko selekzioaren aurka jokatuko dute lehenbiziko partidua, bihar, eta etzi, Kubako selekzioaren aurka, bigarrena. Multzoko lehenbiziko bi sailkatuak finalerdietara pasako dira. Trinketean ere hautatuen artean dago, nahiz eta parte hartuko duen zalantzan egon. Sebastien Echeberry Iparraldeko pilotariarekin osatuko du bikotea. Modalitate honetan ikusteke dago, jokatuko ote duen. Emaitzen arabera, eta hautatzaileak erabakitzen duenaren araberakoa izanen da modalitate honetako Josetxoren parte hartzea.
TONY, ANAIA Josetxo ez da bakarrik egonen Bartzelonan. Familiako kide anitz eta lagun taldeko hainbat ere bertan izanen ditu, animatzen. Baina, horrez gain, Tony, anaia ere ondoan izanen du. Izan ere, Tony ere pilotaría da eta Munduko Txapelketan parte hartuko du ere, Ameriketako Estatu Batuetako selekzioko partaidea da, eta eskuz binaka ariko da, ezker paretan. Tony, anaia nagusiagoa, esperientzia handiko pilotaría da, nazioarteko txapelketetan aunitzetan parte hartu izan du, ohikoa da azken hamarkada luzean. Gainera, jada badaki zer den Munduko Txapelketan domina bat irabaztea, brontzezko domina eskuratu baitzuen 2006an jokatutako txapelketan, eskuz banaka orduan. Banaka eta binaka parte hartu izan du, nahiz eta aurten binaka ariko den, soilik. Bihar eginen du aurtengo debuta, Espainiar estatuko selekzioaren aurka eta etzi, berriz, Kubaren aurka jokatuko du.
Bartzelonakoa, familiarendako hitzordu berezia izanen da, denak elkartuko direlako berriz. Izan ere, Tony, Baztanen urte aunitz eman ondotik, duela bi urte itzuli zen Ameriketako Estatu Batuetara, eta bertan bizi da gaur egun. Pilotak elkartuko ditu bi anaiak. Josetxok pala eskuan eta Tonyk esku huska jokatzen dute, baina, behin, elkarrekin bikotea osatu zuten, 2011ko Joko Panamerikarretan izan zen, Guadalajaran, Mexikon. Eskuz binaka aritu ziren, baita ongi moldatu ere. Zilarrezko domina eskuratu zuten, finalean etxeko taldearen aurka galduta. Ez dute berehalakoan ahaztuko orduko hura. Lehiaketa berezia izan omen zen, Josetxok aipatzen duenez, hura bertze mundu bat da. Izan ere, Munduko Pilota Txapelketetan ez bezala, Joko Panamerikarrak, Olinpiar Jokoen modukoak dira, eta modalitate olinpiko guztiak jokatzen dira eta izugarrizko jendetza biltzen da parte hartzen eta jarraitzen. Hurrengo urtean, Liman, Perun ospatuko dira hurrengo Joko Panamerikarrak, eta, nork daki, beharbada Huartetarrak bertan ariko dira berriz. ●