30 urte

Diputazioan Urralburu ahalguztiduna zegoen maizter, eta egiazki, hantxe bizi zen. Parlamentuan zortzi talde zeuden. Sozialistak nagusi, 15 jarlekurekin. Zentroeskuina ederki ordezkatua, 23 parlamentarirekin. Hori bai, arras zatitua: UPNEK 14; CDSEK 4; Unión Democrata Foralek, 3, eta Apek, 2. Gainerakoen artean, Hbek 7; EA sortu berriak 4, eta Euskadiko Ezkerrak, 1 (handik aitzina, azken sektore hori maldan beheiti hasi zen). Hogeita hamar urte, baina irudi horrek pleistozenokoa dirudi. Sadar erreka ondoko gorritxoak Zabaltzaren agindupean ari ziren. Roberto eta Vicuña, atezain; Ziganda eta Robinson, aurrelari; Sola eta Ripodas, Ibañez eta Sammy Lee, erdian; Castañeda eta Bustingorri, atzean, bakarren batzuk aipatzearren. Hiriko zugar ugariak gero eta gaixoago, gaitz batek jota. Laster hilko ziren, konparazio batera, Sarasateko zugar hostotsu handiak. Lorategietako guardien bukaera etorri zen; txapela berdea buruan, gehienak oso adinekoak, denak muturtu eta zaputz, makila beti eskuan prest mutiko “muturzikin” bihurriak belardietatik kanporatzeko; jendeak “hapi” erraten zien. Udalean, Chorrauten lehen agintaldia (artean ere Upneko barne zatiketa gertatu baino lehen), udal dantzarien taldea desegin zuena, ikurrinaren afera medio. Udaletxeko plazan eta inguruan denda ezagunak: Unzu, Casla Etxea (txorizo andanarekin denda aitzinean zintzilik), eta Ciga oihal-denda ospetsua; erakusleihoan, plaka txiki bat, betidanik hantxe egondakoa: “euskaraz mintzatzen da”. Giro hartan 1988ko Iruñea hartan- sortu zen Euskalerria Irratia, aste honetan oroitarazi eta festa giro ederrean ospatu den bezala, baina ia bertze horrenbertze urte joan dira lizentzia eskuratu aurretik. Noizbehinka, komeni da oroitzea nondik gatozen, eta gauzak zer-nola zeuden, egungo egoeraren bertzelakoa nabarmendu eta aintzat hartzeko. ●