Gazteriaren Sinodoa

Hilabete honetan, Erroman hainbat apezpiku, aditu eta gazte bilduko dira gaztediaren aldeko Sinodoa dela eta. Bertan, azken urte horietan egindako inkestak, ikerketak, testigantzak bildurik eta abiapuntutzat hartuz, saiatuko dira argitasun eta bultzada ematen gazteen partaidetzari Elizan. Europaz kanpo, kristau gehienok adin motzeko jendeak ditugu eta gure lurraldean ordea, gure ospakizun eta bileretan gutxi. Aita Santu Frantziskoren ametsa, Eliza gaztetzea da, hau da, azken belaunaldikoen esperientzia eta iritzietatik ikasiz eta baliatuz elkarte osoa berritzea.

Familia sanoetako adinduek betidanik izan dute gaitasuna txikiengandik ikasteko, beraien begirada erabat berria eta originala delako. Zaharrek jartzen zuten eskarmentua, eta gazteek berriz indarra, iniziatiba, berritasuna. Eliza horren beharrean dago beti. Zeren gure gizartean ere paradigmatzat hartu baititugu gazteen modak eta moduak, janzkerak eta estiloak, baina, Aita Santuak dioen bezala, egungo gure kulturak, zaharrak eta gazteak deskartatzen, baztertzen ditu. Neska mutilek zaila dute lan duin bat, bizitza proiektu sendo bat amestea, lansari dezente bat izatea, bere hitza benetan kontuan hartua izatea. Sinodoaren metodologia interesgarria da: onartu, ulertu eta aukeratu. Lehenik, ikusmen soila gaindituz, onartzea zer den mundua, nola dagoen, zein eragin duten guregan boterea dutenek, hedabide eta propaganda beren esku dutenak. Onartu egoera, errealismoz, egiaz, apaltasunez, arduraz eta kemenez.

Ulertu dugu bigarren puntua. Ongi interpretatu gertatzen dena nolatan gauzatzen den, nork eta zerk eraginda, zein asmo eta helmugarekin. Ulertu hainbat bizitza hutsal, noraezean, ezintasunean, edo beteak, benetakoak, eragingarriak. Norabidea ezagutzen ez duenarentzat, haize guziak kontrakoak ditu. Horrek pentsamendu kritikoa eskatzen du, isiltasuna, entzumena, jakinduria.

Hirugarrenik, aukeratu. Askatasuna hitza diskurtso orotan agertzen da, mitifikatua, jainkotua. Baina zein zaila izaten den aukeratzea, bide posible guztietatik bat hartu eta aurrera egitea, beldur oro gainditu eta apustu garbia egitea. Gaztediaren edertasunetako bat hauxe da. Sistemako gezur eta iruzurrak utzirik, mundu berri bat amestea. ●

Egilea Euskal Pastoraltzako lehendakaria da