Osasun egoera dela eta, Korrikaren 22. edizioa 2022ra atzeratu dute

Erabaki “oso gogorra” izan dela aitortu zuten AEKKO arduradunek atzo Donostian emandako prentsaurrekoan

IRUÑEA – Osasun egoerak behartuta, “erantzukizuna” erakutsiz, eta Korrika “kalea eta jendetza” denaren jakitun, euskararen aldeko lasterketa herrikoia 2022ra arte atzeratuko da. Hala iragarri zuten atzo AEK-KO arduradunek Donostian egindako prentsaurrekoan, eta orain 15 egun hartutako erabakia “oso gogorra” izan dela onartu zuten.

Badakite atzerapena “kolpe handia” dela, ez bakarrik “Korrika beharrezkoa delako”, baita Aekrentzat diru iturri garrantzitsua ere badelako. Inolaz ere, euskaltegien saretik Ez-korrikarik edo antzekorik antolatu nahi ez zutenez, “2022an Korrika berriz ere kalean izango den” itxaropenarekin agertu ziren.

2021ean lasterketa herrikoia nolabait ordezkatu eta euskaltegientzako finantziazio-iturri izan daitekeen jardueraren bat antolatuko ote duten galdetuta, zorrotz mintzatu ziren: “Birpentsatu behar dugun zerbait da. Tarteko zerbait antolatuko ote dugun aztertu behar dugu, baina argi daukagu zerbait izatekotan, Korrika ez den beste zerbait izango dela”. Hurrengo urteko edizioa iritsi bitartean “euskaltegietan lanean jarraituko dugu euskarak merezi duen lekua izan dezan, eta gure herria euskalduntzeko bidean”, adierazi zuten.