GURE ESKOLA

● Gure auzoa. 1977 urtean sortu zenetik, Hegoalde Ikastolak Arrosadia etengabeko aldaketan ikusi du. Hamarkada hauetan ez dira soilik eraikinak aldatu, baita bizilagunak ere. Gure auzoa kultura anaiztasunaren islada bihurtu da eta belaunaldi berriek hau gogoz hartu dute, geureak hain propioak izan diren ospakizun eta jaialdiei kutsu berri eta polita emanez. Orain zenbait urte, hain lorpen zoragarriak izan zituzten ekimenak ere berpiztu dituzte biztanleek; izan ere, orain gutxi berriz martxan jarritako auzotarren batzarrak Udaletxeak gauzatutako azken aldaketei aurre egin eta kaleek dituzten beharretara egokitzeko indarra egin du.

Harrigarria da azken boladan zenbat etxe eta eraikin berri ditugun ikastola ondoan. Lagun gehiago auzora bizitzera etortzeak ez soilik kulturak, baita giroa ere aberastea esan nahi du. XIX. mendean El Motxuelo izenarekin ezagutzen zen auzoa, zenbait etxe sakabanatuz osatutakoa, bizitoki eta elkargune oparoa eta erakargarria bihurtzen ari da.

Ikastolako ikasle eta irakasleok bereziki atsegin dugun azken eransketa Iruñeko Orfeoiaren Parkea da, guretik gertu. Bai gazteek bai eta helduek ere arratsaldea elkarrekin emateko aukera anitzak eskaintzen ditu: zuhaitzak, lakua, haur parkea, harriak, belardia, ibaia, ibilbideak eta beste asko. Leku zoragarria paseatu, txakurrarekin jolastu, lagunekin harri eta hostoekin aritu, ongi pasatu, lakuaz disfrutatu… eta geiserrari begira hunkituta geratzeko.