Santa Zezilia ospatuko dute Lesakako musikariek
‘Los Xey: Una historia de película’ ikusgai larunbatean Harriondoan
– Santa Zezilia musikarien zaindariaren eguna izan zen atzo eta hori ospatzeko, hainbat ekitaldi antolatu dituzte Lesakan. Hasteko, gaur 17.00 etan kontzertua emanen dute Harriondoa kultur etxean Musika Eskolako ikasleek. Asteburuan ere hainbat ekitaldi antolatu ditu Lesakako Santa Zezilia Batzordeak, Lesakako udalaren laguntzarekin.
Azaroaren 25ean, ortziralean 20:00etan Lesakako musika bandak kalejira eginen du. Azaroaren 26an, larunbatean 17:30ean trikitilari eta txistulari taldeek kalejira eginen dute eta 18:30ean, Los Xey: una historia de película dokumentala eskainiko dute Harriondoa kultur etxean. 20:00etan akordeoilari taldea karrikaz karrika ibiliko da. Hain zuzen, 1982ko Santa Zezilia egunean eskaini zuen lehen emanaldia Lesakako abesbatzak eta, aitzinera begira, 40. urteurren hori ospatzeko kontzertua antolatzen hasia da abenduaren 18rako.