Giza Eskubideei buruzko lankidetza-proiektu artistikoa
María José Llorente artista eta arteterapeutarekin jorratu dugu eskolan proiektu artistikoa
BERRIOZAR – Herritarekiko Harremanetako Departamentuak, Bakearen, Bizikidetzaren eta Giza Eskubideen zuzendaritza Nagusiaren bitartez eta giza eskubideen aldeko hainbat GKE eta elkarterekin lankidetzan, “Giza duintasuna: etenik gabeko oihu bat” Sentsibilizazio proiektu bat antolatu du Nafarroako zenbait herrietan, horien artean Berriozar. Proiektu honek hausnarketarako erakusketa ibiltaria izateaz gain tailer artistiko bat eskaintzen du eta Mendialdea II eskolak parte hartze aktiboa izan du honetan, birziklapena, kontzientzia kritikoa eta sormena lantzeko aukera paregabea emanez.
Artista bisual eta arteterapeuta den María José Llorente Wattenberg lagunduta eskolan espazio bat egokitu zen proiektua martxan jartzeko. Haur guztiak gonbidatu genituen lan artistiko kolaboratibo baten sortzailekide izatera, banakako lankidetzak ekimen kolektibo batean parte hartzeko duen garrantzia nabarmenduz eta haurren sormenerako eta hausnarketa kritikorako gaitasuna garatuz: “Nire erabakiak garrantzitsuak dira eta errealitatea sortzen dute”
Gainbirziklatze kontzeptua landu genuen, hau da, zaborretara bideratutako objektuei beste modu batez bigarren aukera bat ematea, jatorrizkoa baino emaitza hobea lortze aldera.
Ikasleek erabiltzen ez zituzten arropak, maindireak, oihalak eta sokak eskolara ekarri zituzten eta hausnarketarako eta eztabaidarako galderak luzatzen genituen: Hau zaborra al da? Zerk eragiten du hau zaborra izatea ala ez? Gure erabakiek eta gure sormenak oihal bat zaborra edo artelana izatea eragiten dute. Nik sortzea erabakitzen badut, zaborra izateari utzi eta arte bihurtuko da, edo, adibidez, balio handiagoko jostailua. Nire erabakiek errealitatea sortzen dute.
Ekintzan eskola osoak parte hartu zuen “mintzalaguna” ekimena martxan jarriz, hau da, maila ezberdinetako ikasleak elkarturik egokitutako espaziotik pasatzen ziren. Bertan materiala sailkatu, moztu eta sare batean lotu, korapilatu, forma eman edo nahastu egiten zuten artelana sortuz.
Hasiera batean emaitza estetikoari garrantzirik eman gabe prozesuan zentratu ginen, elkarrekintzan sortzea da kontua, koloreen eta egiteko moduen erabakiak hartzea, hondakinak baliotsu bihurtzea eta gozatzea.
Artelanak begiak itxita dituen aurpegi bat irudikatzen du (hondakinmaterialez egina), eta malko bat ateratzen zaio, bizitzaz betetako koloretako ibai bihurtzen dena. Ikasleek ibaia sortzen lagundu zuten.
Abenduak 10, Giza Eskubideen Nazioarteko Egunean, Iruñeko Gaztelu plazan udalerri ezberdinetan sortutako lan artistiko kolaboratzailea batuko da, betiere, asmoa izanik Nafarroa osoko batasun-indarra irudikatzea eta “pertsona ororentzako eskubide guztiak” sustatzea.●