La Voz de Galicia (Santiago) - El Comarcal Santiago
Felices 40 anos da asociación de Ordoeste
O presidente, Manuel García, e o vogal Ceferino Almozara levan na directiva veciñal dende o inicio
O Concello da Baña fixo entrega dunha placa co escudo municipal a cada un dos membros da xunta directiva da Asociación de Veciños Camiño Real, da parroquia de Ordoeste, co gallo do corenta aniversario da entidade, xunto cunha reproducción en bronce da casa consistorial ao presidente, Manuel Gómez García, que leva na directiva dende que se constituíu a entidade. Mención especial para Amalia López, a primeira directiva da asociación, e tamén para o extesoureiro Ángel Manteiga, quen faleceu o pasado ano. Ao acto asistiu o alcalde da Baña, Andrés García Cardeso, e maila concelleira de Educación e Servizos Sociais, Alicia Blanco Sande.
A Asociación de veciños Camiño Real de Ordoeste constituíuse o 10 de abril de 1978 nunha reunión celebrada no teleclub parroquial, na que se nomeou presidente da xunta directiva a Herminio Brenlla Canelas e na que figuraban como vogais Manuel Gómez García (da aldea de Cruceiro), Ceferino Almozara (do Couto), e Ángel Manteiga (Cotovades). Catro décadas despois, Manuel Gómez é o presidente da asociación e Ceferino Almoraza continúa como vogal.
Unha obra de teatro e a proxección dun vídeo conmemorativo, editado cunha achega económica da Deputación da Coruña, completaron a xornada. No vídeo aparecen Manuel García, Alicia Blanco (actual secretaria da asociación), Manuel Blanco (tesoureiro) e Ceferino Almozara, quenes recordaron como se constituíu Camiño Real e os fitos máis importantes que acadaron nestas catro décadas en defensa dos intereses dos veciños de Ordoeste. A construción da área recreativa e do parque infantil para os pequenos, ou as melloras na escola, a que lle botaron o tellado e a placa, son algúns destes logros. A actual directiva da asociación Camiño Real aproveitou a ocasión para facer un chamamento á mocidade da parroquia para que se implique e se anime a participar na directiva.