La Voz de Galicia (Santiago) - El Comarcal Santiago
Negreira vive o verán con máis de 30 citas musicais e lúdicas
Os festivais Nicrarock e Noite Folk suben o listón con atractivos carteis
O Verán Cultural 2019 mantén máis de trinta citas musicais, deportivas, lúdicas e de lecer, que tratarán de encher o tempo de ocio de veciños e visitantes entre os meses de xullo e setembro en Negreira, cunha oferta que ano tras ano esperta maior interese e unha participación activa da veciñanza. Catro son as principais citas do Verán Cultural: O espectáculo Son galego, son cubano, de Roi Casal, o sábado 13 de xullo no marco das festas de San Cristovo; o festival Nicrarock, cos mellores grupos do panorama galego como Sés ou Nao (premio ao mellor grupo rock 2019 nos Premios da Música Galega Martín Codax), a noite do venres 19 de xullo; os concertos da Noite Folk (17 de agosto), coas actuacións de Xabier Díaz coas Adufeiras de Salitre, Leilía e a xira do seu 30 aniversario, e A Roda, na área recreativa do Refuxio de Covas; e como colofón, a XIII Feira do Románico, a celebrarse do venres 30 de agosto ao domingo 1 de setembro, e que incluirá espectáculos de lume e malabares ou concertos ao vivo.
Ademais destas actuacións tamén podemos destacar no mes de xullo as actuacións de Cultura a pé de rúa, ou a undécima proba da Liga Autonómica de Agility, así como a excursión ao Aquapark de Cerceda o día 17. No mes de agosto terán lugar os campamentos de verán no albergue de Penedos de Xacinto, no concello de Entrimo (Ourense), e a Gala de Maxia, o venres 30. No mes de setembro compre salientar o festival de bandas de música coa presenza da Banda Eduardo Pondal de As Pontes, a Banda de Música de Chantada e a Banda Ateneo de Negreira.
E non podían faltar nestes tres meses estivais as actividades deportivas. O segundo Open de Tenis, o torneo de baloncesto escolar de Santa Margarida ou, o Día da bicicleta, son os tres pratos fortes deste programa que ademais contará con dúas rutas de sendeirismo.