La Voz de Galicia (Santiago) - El Comarcal Santiago
Festa Rachada da Baña alcanza este ano a súa maioría de idade
«Este ano cumprimos a maioría de idade, algo que significa moito para nós, pois demostra a consolidación desta festa e facémolo coa mesma forza e ganas que na primeira edición». Quen así se expresa é Emilio Lois, a alma máter da Festa Rachada que cada primeiro sábado do mes de xullo se celebra na área recreativa Agra de Chans, en San Vicenzo da Baña, e que o vindeiro 6 de xullo alcanza a súa edición número dezaoito.
Dende as 13.00 horas comezará unha cita que sempre arrinca coas bailas, nas que, coma sempre, estarán As Chispas de Compostela, un grupo que —di Emilio— «leva máis de dez anos colaborando con nós. A continuación actuará a charanga Os Centenarios, que conta con vellos compoñentes doutras formacións como Os Breas de Esteiro ou Os Portelas de Moares e que conservan o son das antigas charangas tradicionais».
Despois do xantar campestre, onde cadaquén leva o seu, haberá un campionato de xogos tradicionais. E sobre as seis da tarde comeza de novo a música da man dos Fondãos do Pífaro, grupo de percusión portuguesa, inspirado nas formacións da zona do Fundão, en Portugal. E, un ano máis, volven Armadanzas de Laraño, grupo de baile «imprescindible» nesta festa e que vén de acadar un primeiro premio no concurso de baile Azaloira. «Só eles xunto coas súas familias, xuntan máis de cen persoas nunha soa merenda», subraia Lois. E estará tamén Cé, a orquestra Pantasma
que, como noutras edicións «pon a brincar a pequenos e maiores».
A medida que vaia avanzando a tarde do sábado 6 de xullo, irá aumentando o ritmo, pois agarda a quenda do cuarteto Picuíña, dende Marín, que —afirma Emilio Lois— «é un dos poucos cuartetos en Galicia cunha longa traxectoria e que ten acadado diversos premios en importantes concursos de gaiteiros».
E outros vellos coñecidos son Tanto nos Ten, de Redondela, quenes presentarán o seu novo disco, Cortando fíos. E para rematar as actuacións chega A Requinta da Laxeira, un dos grupos que máis festas ten percorrido en Galicia, «mostrando que a música tradicional non é algo para minorías». E despois chegará a foliada que se prolongará ata ben entrada a noite, porque a Festa Rachada non remata coas actuacións do programa. Segue despois dun día en que haberá xantar campestre, xogos populares e ata hai posibilidade de durmir na zona de acampada.