La Voz de Galicia (Santiago) - El Comarcal Santiago
Herba Grileira, dez anos de latexo musical
A escola de baile e música tradicionais de Melide ten 134 alumnos con idades de 5 a máis de 70 anos
Melide non se entende sen música. Ten fondas raíces no seu pasado, latexa con forza no presente e ten todos os visos de non perder ese ritmo no futuro. Desa arraigada tradición musical naceu no 2009 a escola de baile e música galegas Herba Grileira, que conmemora este ano un aniversario «especial porque aínda que dez anos non son moitos, conseguir manter unha asociación tan activa durante tanto tempo é motivo de celebración», di Iván Gómez. El é o presidente da asociación que, tres anos despois de que vise a luz a escola, houbo que constituír para darlle soporte ás medras.
Hoxe, Herba Grileira «está no seu mellor momento, tanto polo número de alumnos e polo número de socios, como polas actividades que facemos», afirma. E aporta cifras. O colectivo asocia a 122 persoas e de 134 é o numero de alumnos da escola, na que catro mestres imparten as disciplinas de gaita, canto e pandeireta, baile, percusión e acordeón. En Melide «hai canteira», afirma, logo desa exposición, Iván Gómez, quen, de feito, subliña que «nós destacamos polo elevado número de nenos que hai na escola, tal e como pode comprobarse en calquera actuación». Pero, «ademais de xente que practique, precisamos xente que dinamice como fan os profesores de Herba Grileira, e iso non sabemos si está garantido», advirte.
Dende logo que na escola de baile e música tradicionais, con alumnos dende os 5 anos ata máis de 70, poñen todo da súa parte. Para mostra, a gala de fin de curso que celebraron a pasada fin de semana e na que seguiron ao pé da letra a súa filosofía de que «a música e o baile tradicionais sempre foron compartidos coa xente». Foi así como sacaron á rúa as exhibicións do que aprenderon ao longo do curso, e o percorrido musical que o alumnado e os mestres fixeron pola vila con paradas para actuar en oito prazas emblemáticas converteuse «nunha festa popular aberta a todos os veciños», afirma o presidente da Asociación Cultural e Musical Herba Grileira.