La Voz de Galicia (Santiago) - El Comarcal Santiago
«A Denominación deulle futuro ao pemento de Herbón»
Fervente defensora do auténtico produto, a presidenta do Consello Regulador da DOP anima a máis produtores a sumarse á etiqueta da máxima calidade.
Milagros González Refojo (Lestrobe, 1960), non é natural de Herbón pero, despois de media vida coma pementeira, leva o cultivo no corazón, tanto que sempre se refire ao produto coma «o noso pemento». Dende hai dous anos, preside o Consello Regulador da Denominación de Orixe Protexida (DOP) Pemento de Herbón, que cumpre unha década.
—Que valoración fai destes dous anos de mandato?
—Seguimos coa traxectoria iniciada cando botou a andar a denominación. Eu xa fun vocal durante oito anos e é continuar co traballo de difusión e promoción do noso pemento.
—E como pementeira?
—Os comezos foron difíciles. Había que volver a empezar cun pemento ao que antes se lle chamaba pemento de Padrón e empezar a chamarlle de Herbón e houbo que cambiar moitas mentalidades. Foi un traballo duro, pero se boto a vista atrás teño claro que había que facelo e non hai pesar ningún; démolo feito porque a denominación era a única maneira de darlle futuro ao noso pemento. Se non se fixera a DOP, tería pouco futuro.
—Cre que o nome «Pemento de Herbón» xa está consolidado?
—Penso que agora si. Empezamos a notar que a xente demanda pemento con DOP, de Herbón, e iso que so levamos dez anos. Aínda así, hai quen lle segue chamando pemento de Padrón e lle tes que recalcar que é de Herbón. Pero penso que estamos no bo camiño.
—Un dos retos que se marcou foi integrar a máis produtores na denominación. Logrouno?
—Iso está parado totalmente. A xente é reacia a querer entrar, non sei se por falta de interese ou porque están cómodos como están, vendendo os seus pementos fóra da Denominación sen que ninguén os controle e sen custos adicionais.
—Segue con ese obxectivo?
—Si. Eu o que quero é que este cultivo non morra, que teña longo percorrido e futuro e cantos máis esteamos dentro da DOP máis seremos para apoiarnos e defendelo. As portas da DOP están abertas para quen queira entrar.
—A Denominación confirmouse como a mellor defensa para o auténtico pemento de Herbón?
—Por supostísimo. Imaxina a cantidade de pemento que entra de fóra e todo co nome de Padrón. Comíannos se non chegamos a facer a DOP.
—A etiqueta da máxima calidade, axudou a darlle maior difusión?
—Moito. Coa DOP, os envasadores crearon páxinas web, estableceron a venta on line de modo que o produto pode chegar a calquera sitio, incluso ao estranxeiro. A Denominación abriu o mercado e mesmo modernizou o cultivo, de modo que é un gran escaparate para o noso pemento.
—¿Como ve o relevo xeneracional?
—Falo con moita xente da agricultura e da gandería e está moi difícil en tódolos sectores. Pero aínda hai esperanza de que algúns mozos se decidan. O exemplo é a sociedade a que pertenzo e na que, cando algún socio se xubila, sempre aparece alguén que o releve, polo que eu teño fe de que así sexa e haxa relevo.
«Os comezos foron difíciles porque houbo que cambiar moitas ideas»
«A DOP é un gran escaparate para o noso pemento e axudou a modernizar o cultivo»