La Voz de Galicia (Santiago) - El Comarcal Santiago
Éxito das visitas teatralizadas sobre Rosalía de Castro
Antes do parón, máis de 1.500 persoas participaron na actividade de Padrón
Antes do parón pola pandemia, o Concello de Padrón tiña en marcha unha actividade cultural cun tirón destacado. Trátase das visitas teatralizadas sobre a figura de Rosalía de Castro, nas que participaron un total de 1.663 persoas dende o verán do ano pasado, segundo datos oficiais. Esta actividade, que protagoniza a compañía de teatro Os Quinquilláns e que organiza o Concello no marco do programa O Teu Xacobeo, está destinada a todo tipo de público. O éxito das visitas é «indiscutible», segundo opina a concelleira de Cultura e Turismo, Lorena Couso, que valora moi positivamente esta actividade cultural. «Dende o Concello traballamos para ofrecer unha ampla proposta cultural e de ocio aos nosos cidadáns e as visitas teatralizadas consolidáronse no último ano como unhas das opcións favoritas de padroneses e turistas», afirma a edila, que espera poder retomar a visitas pasado o verán.
A boa acollida da actividade foi tal que mesmo houbo lista de agarda para poder acceder ás visitas, habendo máis de 60 persoas ao día intentando obter unha entrada. Houbo visitas programadas en aberto, ás que o público podía acceder libremente —naquelas polo casco histórico de Padrón— ou a través de inscrición previa — nas realizadas na Casa Museo de Rosalía—. Ademais distintos colectivos accederon a esta visitas como grupos de escolares dende Infantil a Educación Secundaria Obrigatoria, asociacións e colectivos de terceira idade. Os días de maior afluencia, por exemplo coa presenza dos centros educativos, tiveron que facerse ata tres pases por centro. Durante as visitas teatralizadas, o grupo teatral Os Quinquilláns encarnan a Rosalía de Castro e ao pintor Modesto Brocos —autor do único retrato pintado en vida da escritora—, e acompañan aos asistentes nun percorrido polo casco histórico de Padrón e pola Casa-Museo.