La Voz de Galicia (Santiago) - El Comarcal Santiago
NUEVAS RUTAS
Un recorrido espectacular por la zona alta de Dodro
O Concello de Dodro inaugurou un novo sendeiro, que leva ao camiñante á aldea de Bustelo, ao Pozo Bastón e ao miradoiro da Muralla. O percorrido a pe súmase a oferta de Sendeiros de Dodro, unhas rutas para descubrir o concello paso a paso. Esta, ademais, ten a peculiaridade de que pisa territorio doutro municipio limítrofe, o de Rianxo, en concreto para visitar o pozo Bastón, unha paraxe natural no curso do río Té, que nace entre as rochas do monte da Muralla e que transcorre por terras rianxeiras agás un pequeno treito que discorre por Dodro. No pozo Bastón, o río sorprende cunha pequena fervenza que forma un estanque natural onde chegan a bañarse os mozos.
Na baixada ata o pozo, Dodro tería que mellorar o tramo xa que, a día de hoxe, é un tanto perigosa pola inclinación e o camiño e, de feito, o concelleiro de Cultura e Patrimonio, Xoán Xosé Vicente, así o ve e xa fala de colocar unha corda á que poder agarrarse.
Polo demais, esta ruta leva ao camiñante por paraxes naturais de gran beleza, por camiños que, «de non seren polos paseos, estarían pechados», tal e como corrobora Xoán Xosé Vicente e por corredoiras antigas nas que é posible ver aínda muros de mampostería seca, catalogados pola Unesco como Patrimonio da Humanidade.
A nova ruta ten dúas variantes. A máis curta, de 3,8 quilómetros, sae da aldea de Bustelo para coñe
«Hai camiños que estarían pechados se non fose polas persoas que os pisan ao camiñar»
cer a riqueza paisaxística e patrimonial do núcleo de maior altitude do concello e tamén o que máis afastado se atopa. O percorrido é circular polo que parte da aldea e acaba no mesmo lugar, tras visitar o cruceiro de Alfredo, a corredoira tradicional, o pozo Bastón e de volta ao lugar.
O cruceiro de Alfredo atópase no medio da aldea, á beira do antigo Camiño dos Mortos, por onde se levaban as persoas finadas cando o núcleo de Bustelo pertencía ao concello de Rianxo, onde eran enterradas tras cruzar o río do Treito, case a altura do Pozo Bastón. Un ano de moita enchenta non lograron atravesar ese paso e foi cando empezaron a enterrar aos falecidos na parroquia de San Xoán de Laíño, a partir do que Bustelo empezou a formar parte do concello de Dodro.
No mesmo núcleo de poboación e moi próximo ao anterior cruceiro, localízase o de Bustelo do Monte que ten na base un peto cun retablo.
A segunda opción da ruta, de case 12 quilómetros, inclúe ademais a subida ao miradoiro da Muralla, tras visitar o Pozo Bastón. Neste caso xa hai un percorrido sinalizado con franxas brancas e amarelas polo PR-G, as siglas en Galicia de sendeiro de pequeno percorrido.
Este tramo require máis esforzo, sobre todo na subida ao miradoiro do monte, habilitado en terreos do concello de Rianxo é que é un auténtico foco de visitas, tanto que as pistas xa están medio desfeitas polo continuo paso dos vehículos. A pe, hai que deixar atrás as aldeas de Campelo e A Varela, onde as vistas cara a ría son xa espectaculares e deixan entrever o que espera máis arriba, no miradoiro, no que se pode ver toda a grandeza da Arousa por un lado, a ría de Muros e Noia por outro e mesmo a capital de Galicia por outro extremo.
Arriba, o camiñante seguro que fará un bo descanso porque a subida é bastante dura, un respiro antes de iniciar a baixada cara a aldea de Bustelo, onde remata a ruta. Esta depara espazos únicos, como unha auténtica corredoira tradicional dende o núcleo cara a aldea da Ferrería, situado no Araño, no concello de Rianxo. Tamén cabe a posibilidade de facer fotos do Pozo Bastón dende o lado de Dodro, das que existen poucas xa que todas as oficiais foron tomadas dende o outro lado do río Té. Por certo, o Pozo Bastón é un lugar escondido no que mesmo se bañan os rapaces xa que o río fai
unha pequena fervenza que forma un estanque natural. O espazo localízase entre os concellos de Dodro e Rianxo e mesmo hai persoas que din que pertence ao primeiro municipio e nalgunhas edicións topográficas aparece situado nel. Tras deixar o Pozo Bastón, o camiñante segue a senda PRG15, denominada Subida ao Monte Muralla, cun pico de 679 metros de altura. Aproveitando esta ruta, vólvese cara a aldea de Bustelo por outro camiño tradicional.
O Concello inaugurou esta ruta con grande éxito xa que cubriu as 55 prazas ofertadas. En torno a 30 asistentes eran veciños do concello, con gañas de coñecer o seu propio territorio. Con este camiño, Dodro completa unha serie de sendeiros (seis en total), que permiten ao camiñante, sexa veciño ou foráneo, coñecer os espazos físicos máis significativos do municipio e mesmo imaxinarios, como a aldea de Sernanselle, que aparece na novela Pensa Nao do escritor e veciño de Dodro Anxo Angueira. Entre as rutas, Os días olvidados, que percorre os lugares nos que viviu o poeta Eusebio Lorenzo Baleirón.